Қазақстан чемпионы «Ордабасы» Украина құрамасының вингері Алексей Гуцулякпен келісімшартқа қол қойғанын хабарлады. 28 жастағы футболшымен екі жылдық, яғни 2028 жылдың соңына дейінгі келісімшарт жасалды. Ол Шымкент клубына еркін агент ретінде ауысты: 2026 жылдың жазында оның житомирлік «Полесьемен» келісімшарты аяқталған. Мәміленің қаржылық шарттары жария етілмеді.
Гуцуляк – Львовтағы «Карпаты» академиясының түлегі. Украина Премьер-лигасында ол «Десна», «Днепр-1» және «Полесье» командаларында ойнады, ал 2016 жылы испаниялық «Вильярреал» жүйесінде өнер көрсетті. «Полесье» сапында вингер екі маусымда 65 ресми матч өткізіп, 20 гол соқты және 10 нәтижелі пас берді. Кәсіби деңгейде оның есебінде барлығы 280 матч пен 56 гол бар. Transfermarkt порталы футболшыны 3 млн еуроға бағалайды.
Гуцуляк Украина құрамасында 2024 жылы дебют жасады, содан бері 16 матчта алты гол соқты. 2025 жылы ол тоғыз ойында бес гол соғып, ұлттық команданың үздік бомбардирі атанды.
Клубтың медиаменеджері Бейбіт Әлібеков футболшыға АҚШ пен Жапониядан да ұсыныс түскенін айтты. «Ордабасы» ел чемпионы ретінде 2027/28 маусымындағы Чемпиондар лигасының іріктеу кезеңінде ойнайды, украиналық футболшы бұл матчтарға қатыса алады. Ауысу туралы клуб өзінің Instagram парақшасында жариялады.
Бұл – шымкенттіктердің тарихындағы ең табысты маусымнан кейінгі алғашқы ірі ауысуы. 2026 жылы «Ордабасы» Премьер-лиганы мерзімінен бұрын 68 ұпаймен жеңіп алды, ал 7 қарашада Кубок финалында «Қайсарды» 4:1 есебімен ойсырата жеңіп, алғаш рет алтын дубль жасады. Чемпиондық атаққа ҚПЛ-2026-ның үздік бомбардирі атанған норвегиялық шабуылшы Бьорн Йонсен зор үлес қосты.
Бұған дейін клуб командасын екі кубокқа жеткізген Андрей Мартинмен қоштасты. Молдовалық маман «Ордабасыны» 2024 жылдың желтоқсанынан бері басқарып келген еді, тараптар келісімшартты ұзартпауға келісті.
