11 қарашадан 12 қарашаға қараған түні Солтүстік Тауридтер метеор ағыны шарықтау шегіне жетеді. Оны Қазақстанның барлық өңірінде, соның ішінде Астана мен Алматыда көруге болады. Метеорлар көп болмайды — сағатына бесеуге дейін. Есесіне Тауридтер баяу әрі жарқын «аққан жұлдыздарымен» танымал, олардың арасында болидтер — ең жарық жұлдыздардан да жарқырап көрінетін жалындар кездеседі.
Ағынды Астана уақытымен түн ортасы шамасында және одан кейін бақылаған дұрыс. Бұл кезде метеорлар ұшып шығатындай көрінетін Торпақ шоқжұлдызы аспанның оңтүстік бөлігінде биікке көтеріледі. Оны Орион шоқжұлдызының жанындағы қызғылт Альдебаран жұлдызы арқылы оңай табуға болады. Телескоп пен дүрбі қажет емес: метеорлар жай көзге көрінеді. Дегенмен қала жарығынан алысырақ кетіп, көзді қараңғылыққа 15–20 минут үйрету керек. Ай кедергі келтірмейді: жаңа ай 9 қарашада туды, ал жіңішке орақ күн батқаннан кейін көп ұзамай батады. Ең бастысы — аспанның ашық болуы.
- Ағынның белсенді кезеңі: 20 қазаннан 10 желтоқсанға дейін
- Шарықтау шегі: 11 қарашадан 12 қарашаға қараған түн
- Ең қолайлы уақыт: түн ортасынан таң атқанға дейін
- Қайда қарау керек: Торпақ шоқжұлдызы, аспанның оңтүстік-шығыс және оңтүстік бөлігі
- Саны: сағатына 5 метеорға дейін
Метеор — ауада жанып бара жатқан ғарыштық құм түйіршігінің не ұсақ тастың ізі. Space.com хабарлауынша, Тауридтер — Энке кометасымен байланысты сынықтар: Жер жыл сайын күзде осы комета қалдырған шаң мен тас жолағы арқылы өтеді. Пермь политехникалық университетінің сарапшысы Евгений Бурмистов РИА Новости агенттігіне Солтүстік Тауридтердің 2004 TG10 астероидымен де байланысты екенін, ал олардың бөлшектері бір сантиметр және одан да үлкен болатынын айтты. Сондықтан бұл ағынның ең жарық метеорлары жарықтығы жағынан Шолпанмен теңеседі.
Келесі жұлдыз жаңбыры — Леонидтер. Халықаралық метеор ұйымының болжамынша, олардың шарықтау шегі 17 қарашадан 18 қарашаға қараған түнге келеді: сағатына 15 метеорға дейін. Бірақ түннің бірінші жартысында оларды көруге алғашқы ширектегі Ай кедергі келтіреді.
