«Альянс Банк» АҚ директорлар кеңесінің бұрынғы төрағасы Марғұлан Сейсембаев банк басқармасының бұрынғы төрағасы Жомарт Ертаевқа қатысты күдік туралы Бас прокуратураның хабарламасына Facebook-те пікір білдірді.
«Бұл ескі іс емес, жаңа іс», — деп жазды Сейсембаев. Оның айтуынша, істі банктің жаңа акционерлері бұрынғы жалдамалы менеджерлердің қызметін теріс пайдалануына байланысты қозғаған. Өзінің түсінуінше, әңгіме «откат» үшін қайтарылмайтын несиелер беру туралы болып отыр. Сейсембаевтың сөзінше, Ертаевтың бірнеше орынбасары жарты жылдан бері тергеу изоляторында отыр: басқарма төрағасының бірінші орынбасары А. А. Агеев пен заң мәселелері жөніндегі орынбасары К. Бекетов, ал орынбасар Э. Решетова үйқамақта. Оның айтуынша, банктің бұрынғы акционерлеріне қатысты қылмыстық іс те, банк тарапынан наразылық та жоқ.
Бұған дейін ҚазТАГ агенттігі Бас прокуратураның баспасөз қызметіне сілтеме жасап, Ертаев ірі көлемде жымқырды деген күдікке ілінгенін хабарлаған. Іс «Альянс Банк» АҚ лауазымды тұлғаларына қатысты ҚК-нің 189-бабы 3-бөлігінің 1-тармағы бойынша қозғалған. Бұл бап алдын ала сөз байласқан адамдар тобының қызмет бабын пайдаланып, сеніп тапсырылған мүлікті ірі көлемде иемденуі немесе ысырап етуі туралы. Ертаев 22 маусымда күдікті деп танылды, сотқа дейінгі іс жүргізу жүріп жатыр.
30 маусымда ведомствоаралық топ «Алма-ТВ» ЖШС-ын басқаратын Ертаевты Алматыда ұстамақ болған, бірақ ол қосалқы есік арқылы кетіп қалған. ҚазТАГ дерегінше, ұстау әрекеті бұрынғы Альянс банктегі істерді тергеу барысында анықталған жаңа мән-жайларға байланысты болған.
2013 жылы Альянс банк бұрынғы топ-менеджерлеріне қатысты қаржы полициясына жүгінген. Банктің нұсқасы бойынша, олар Ертаевқа кепілсіз әрі банк үшін тиімсіз шарттармен қайтарылмайтыны алдын ала белгілі несиелер берген. 2014 жылғы тамызда Ертаев наразылықтарды реттеу аясында мерзімі өткен үш кепілсіз несие бойынша негізгі қарыз бен пайыздың 2 млн долларға жуығын қайтарған.
Ертаев 43 жаста. 2002–2007 жылдары «Альянс Банк» АҚ басқармасының төрағасы болған, кейін БТА Банк (Украина) және Еуразиялық банк (Алматы) басқармаларына төрағалық еткен. 2010 жылдан бері Bank RBK директорлар кеңесінің кеңесшісі, 2011 жылдан бері Еуразиялық қаржылық консалтинг орталығын басқарады, ал 2014 жылғы 10 қарашадан бастап «Алма-ТВ» ЖШС-ның бас директоры.
«Радиоточка» материалдары бойынша.
