Grand Theft Auto VI ойыны 19 қарашада шыққанға дейін оған шамамен 7,71 млн алдын ала тапсырыс берілген. Мұндай бағаны цифрлық көшірмелер сатылымын бақылайтын Sensor Tower сараптама компаниясы берді. Компанияның есебінше, алдын ала тапсырыстар Rockstar Games-ке шамамен 751 млн доллар табыс әкелген. Бұл Ұлттық банк бағамы бойынша шамамен 340 млрд теңге. Rockstar мен оның иесі Take-Two бұл сандарға ресми түсінік берген жоқ.
Сатып алушылардың басым бөлігі Sony консолін таңдаған. Sensor Tower деректеріне қарағанда, PlayStation 5-ке шамамен 5,74 млн алдын ала тапсырыс, яғни 74%-ы тиесілі. Xbox Series X пен Series S-ке шамамен 1,97 млн, яғни 26%-ы келеді. GTA VI-дың маркетингтік құқығы Sony-ге тиесілі. Компьютерге арналған нұсқасының шығу күні әлі белгісіз.
Салыстыру үшін, 2020 жылы шығар алдында Cyberpunk 2077 ойынына шамамен 8 млн алдын ала тапсырыс берілген еді. Демек, GTA VI сатылымға шығуына екі апта қалғанда бұл көрсеткішке жақындап қалды. Piper Sandler инвестициялық банкінің сарапшылары ойын шыққаннан кейінгі алғашқы апталарда шамамен 45 млн дана сатылады деп күтеді.
Ойынның шығуына көп қалған жоқ. Алдын ала тапсырыс бергендер оны 10 қарашадан бастап жүктеп ала алады: PlayStation 5-те жүктеу жергілікті уақыт бойынша түнгі сағат 00:00-де басталады, деп хабарлады Sony. Консольде кемінде 212 ГБ бос орын болуы керек. Xbox-та алдын ала жүктеудің басталатынын Rockstar Games те жариялады.
Ойынның бағасын Rockstar жазда жариялаған болатын:
- стандартты нұсқа – 79,99 доллар, Ұлттық банк бағамы бойынша шамамен 36,2 мың теңге;
- қосымша көліктер, қару және киім кіретін Ultimate Edition кеңейтілген нұсқасы – 99,99 доллар, шамамен 45,3 мың теңге.
Қазақстандықтар үшін цифрлық нұсқаны сатып алу оңай емес, өйткені елде PlayStation Store-дың ресми аймақтық дүкені жоқ.
Grand Theft Auto VI – бейнеойындар тарихындағы ең көп сатылған сериялардың бірінің жалғасы. Жаңа бөлімнің оқиғасы Флориданың ойдан шығарылған нұсқасы – Леонида штатында өтеді, ондағы Вайс-Сити қаласының прототипі – Майами. Алдыңғы ойын GTA V 2013 жылы шығып, алғашқы тәулікте шамамен 800 млн доллар тапқан. Сатылым басталар алдында Rockstar Майамидегі GTA VI жарнамасына 3,9 млн доллар жұмсайды.
