Алматы облысындағы Қызылағаш кентінде 2010 жылғы қасіреттен кейін бұзылған бөгеттің орнына салынатын жаңа бөгетті қаржыландыру мәселесі сәтті шешіліп жатыр. Бұл туралы 2015 жылғы 20 қазанда «Радиоточкаға» «Қазсушар» РМК Алматы филиалының директоры Сейілхан Мұхамадиев айтты.
Оның сөзінше, 50 млн теңге бөлу туралы келісімді бекіту ғана қалды. «Қазсушар» 2016 жылға құрылысты толық қаржыландыруды сұраған, ал Қаржы министрлігі ақшаны мекеменің өтінімі бойынша бөледі. Мұхамадиевтің айтуынша, жұмыс түрлерінің тізбесі жазылған құжаттар кеше тапсырылды. Биыл бөлінген 50 млн теңгеге болашақ құрылыстың алғышарттары жасалады.
«Мұз қозғалды», — деді филиал директоры.
Шамамен үш ай бұрын «Қазсушар» басшысы жобаны Ислам даму банкі арқылы қаржыландыру мәселесі әлі шешілмегенін айтқан еді. Сол кезде жаңа бөгеттің нақтыланған құны — 5 млрд 900 млн теңге деп аталып, құрылыс 2015 жылдың төртінші тоқсанында-ақ басталуы мүмкін екені айтылған.
Қызылағаштағы бөгетті 2010 жылғы 11 наурызда су бұзып кетіп, 45 адам қаза тапты. Бөгет жеке меншікте болған. Қызылағаш су қоймасын басқарушылар суару маусымында табыс табу үшін судың барынша көп көлемін жинамақ болып, оны ағызбаған. 2011 жылғы ақпанда сот бөгеттің иелері — Жүнісовтер ағайындыны кінәлі деп танып, оларды колония-қоныста өтейтін бес жылға бас бостандығынан айырды және үш жылға лауазым атқару құқығынан айырды.
«Радиоточка» материалдары бойынша.
