Түркияның Измир провинциясы Алиаға ауданындағы HABAŞ болат құю зауытында болған жарылыстан қаза тапқандар саны 17-ге жетті. Бұл туралы 9 қарашада кешке Түркияның Денсаулық сақтау министрі Кемал Мемишоғлу хабарлады: ауыр жараланған тағы бір жұмысшы ауруханада көз жұмды. Кемінде 12 адам ем қабылдап жатыр. Жарылыс болған бойда билік алты адам қаза тапқанын айтқан еді.
Жарылыс жергілікті уақыт бойынша сағат 11:46-да (Астана уақытымен 13:46-да) болды. Измир губернаторы Сүлейман Элбанның айтуынша, қазанды ауыстыру кезінде көпірлі кран құлап, оның сынықтары газ құбырын зақымдаған, содан газ жарылған. Ол сәтте өндіріс тоқтап тұрған, бірақ аумақта жабдық ауыстырумен айналысқан 300-ден астам жұмысшы болған, олардың 20-сы апат болған жерде еді.
Менемен прокуратурасы іс бойынша алты адамды ұстады, олардың аты-жөні мен лауазымы жарияланбады. Ішкі істер министрі Мұстафа Чифтчи зауытқа екі аға инспекторды жіберді. Президент Режеп Тайып Ердоған үкімет отырысынан кейін оқиғаның қалай және неліктен болғанын, немқұрайлылыққа жол берілген-берілмегенін және кім жауапты екенін анықтауға уәде берді. Ауруханадағы жаралыларға денсаулық сақтау, энергетика және еңбек министрлері барды. Алиаға соты прокуратураның сұрауы бойынша тергеу аяқталғанға дейін апат туралы жаңалық, сұхбат пен пікір жариялауға тыйым салды.
HABAŞ – Түркиядағы ең ірі болат өндіретін компаниялардың бірі. Ол 1987 жылдан бері жұмыс істейді, қуаты жылына 4,5 млн тонна болат. Кәсіподақтар оның кәсіпорындарындағы қауіпсіздік мәселесін бұрыннан айтып келеді. Evrensel газетінің дерегінше, Алиағадағы зауытта үш аптаның ішінде жұмысшы қаза тапқан үшінші оқиға осы. 5 қарашада жер қазатын техниканың дөңгелегі жарылып, бір адам қаза тапты, ал 21 қазанда бір жұмысшы 8 метр биіктіктегі баспалдақтан құлап кетті.
