Алматы полициясы әлеуметтік желіге қауіпсіздік белдігін тақпай көлік жүргізіп бара жатқан видеосын салып, бұл үшін өзіне ештеңе болмайтынын айтқан жүргізуші әйелді тапты. Тексеру барысында оның рөлге отыруға мүлдем құқығы жоқ екені анықталды: сот оны бұған дейін көлік жүргізу құқығынан айырған.
Әйелге бірден бірнеше бап бойынша әкімшілік іс қозғалды: көлік жүргізу құқығынан айырылғаннан кейін көлік басқару, қауіпсіздік белдігін пайдалану ережесін бұзу, сот шешімін орындамау және жалған ақпарат тарату. Материалдар сотқа жіберілді, көлік айыппұл тұрағына әкетілді. Көлік иесі де жауапқа тартылды — ол рөлді жүргізу құқығынан айырылған адамға сеніп берген.
Видеода әйел белдік тақпай көлік жүргізіп келеді. Желі қолданушылары оны сынай бастағанда, ол белдік тағу — өзінің жеке шаруасы екенін, ешқашан белдік тақпағанын және тақпайтынын айтып жауап қайтарған.
«Ашықтан-ашық көрсетілген тәкаппарлық пен жазадан құтылатынына деген сенім жауапкершіліктен босатпайды. Полицияның ұстанымы айқын: заң алдында бәрі тең», — деп мәлімдеді Алматы қаласының полиция департаменті.
Полиция жүргізуші әйел түскен бейнежазбаны өзінің Instagram парақшасында жариялады:
Жол жүру ережесі бойынша жүргізуші де, жолаушылар да қауіпсіздік белдігін тағуы тиіс. Жүргізуші әйелге қандай жаза берілетінін сот шешеді. Полиция әйелдердің аты-жөнін атамайды.
