Ақтөбеде көлік, коммуникациялар және жаңа технологиялар колледжінің 17 жастағы студентінің өліміне қатысты іс бойынша сот басталды. Айыптау тарапының нұсқасы бойынша, 29 сәуірге қараған түні 21 жастағы жоғары курс студенті Мади Сугербай кіші курстағы жігіттерді жатақхананың төртінші қабатындағы терезеден бір-біріне байланған көрпелермен түсуге мәжбүрлеген. 17 жастағы жігіт құлап, басы мен ішкі ағзаларынан ауыр жарақат алды. Ол 42 күн реанимацияда жатып, маусым айында қайтыс болды.
Сотталушыға абайсызда адам өліміне әкеп соқтыру және қауіпті жағдайда қалдыру бойынша айып тағылған. Сот отырысы ашық режимде өтіп жатыр, оған журналистер қатысуда.
Сотта студенттердің бірінен жауап алу кезінде түсірілген бейнежазба көрсетілді. Оның айтуынша, түнгі сағат үштер шамасында жоғары курс студенті олардың бөлмесіне кіріп, алдымен темекі іздеген, кейін дүкеннен тамақ әкелуді талап етіп, ұрамын деп қорқытқан. Ол кезде жатақхананың есігі жабық болғандықтан, ол жігіттерді басқа бөлмеге апарып, көрпелерді байлауды бұйырған. Студенттер бес көрпені бір-біріне байлап, біреуі ұшынан ұстап тұрған, ал 17 жастағы жігіт төмен түсе бастап, құлап кеткен.
Қаза тапқан жігіттің анасы сотта өзіне таңғы сағат төрттер шамасында телефон соғылғанын айтты. Колледжде алдымен ұлы дүкенге өзі барамын деп, терезеден шығып кеткенін айтқан. Ана бұған сенбейді: бір күн бұрын кешке ол ұлына азық-түлік алуға ақша аударған. Оның сөзінше, ұлы комада жатқанда оның чемоданын дәлізге шығарып, бөлмені босатуды сұраған, ал сотталушының туыстары осы уақыт ішінде онымен хабарласпаған. Әйел колледж қызметкерлері мен жатақхана жұмыскерлерінің де жауап беруін талап етіп отыр.
Сотталушы кінәсін мойындамайды. Оның анасы ұлына жала жабылды деп санайды: оның айтуынша, ұлы жігітке дүкеннен бірдеңе алуға 2 000 теңге ғана беріп, өз бөлмесіне кеткен.
Сот істі қарауды жалғастырады, келесі отырыстың күні әлі айтылған жоқ. Үкім шыққанға дейін Мади Сугербай кінәсіз деп саналады.
