Алматының Медеу аудандық соты 11 ақпанда «Трибуна» газетінің бас редакторы Жанболат Мамайды екі айға, 10 сәуірге дейін қамауға алуға санкция берді. Бұл туралы «Әділ сөз» сөз бостандығын қорғау халықаралық қоры хабарлады. Бұлтартпау шарасы Мұхтар Әблязовпен байланыстырылатын «БТА» банкі қаражатын ұрлау ісі бойынша тергеу аясында таңдалды.
Жанболат Мамай қамауға алынар алдында көпшілікке мәлімдеме жасады. Оның айтуынша, ол өзіне тағылған айыптар бойынша кінәлі емеспін деп санайды, бизнеспен және қаржы қызметімен ешқашан айналыспаған. Журналист қылмыстық қудалауды өзінің кәсіби жұмысымен байланыстырып, оның мақсаты «Трибуна» газетін жабу деп есептейтінін айтты.
«Бұл қудалауды саяси астары бар қысым деп санаймын», — деді Мамай.
Қылмыстық істі Сыбайлас жемқорлыққа қарсы іс-қимыл ұлттық бюросы тергеп жатыр. Тергеу деректері бойынша, іске «БТА Банк» АҚ директорлар кеңесінің бұрынғы төрағасы Мұхтар Әблязов, оның серігі Жақсылық Жәрімбетов және басқа да адамдар қатысты. Оларға банк қаражатын ұрлады деген айып тағылып отыр.
«Радиоточка» материалдары бойынша.
