Мазмұнға өту
2026 жылғы 22 қараша, жексенбі

Microsoft Outlook іркілісінің себебін атап, 13 түзету уәде етті

Қате тек ядролары көп жаңа серверлерде ғана байқалған, ал компания жүктеме сынақтарын ескі жабдықта жүргізген.

Папка с приложениями Microsoft, в том числе Outlook и Teams, на экране смартфона
Фото: Samuel Boivin / NurPhoto via Getty Images

Microsoft 12–13 қарашада болған Outlook пен Microsoft 365-тің басқа қызметтеріндегі жаһандық іркіліс туралы қорытынды есебін жариялады. Сол іркіліс салдарынан әлемнің түкпір-түкпіріндегі пайдаланушылар бір тәулікке жуық жұмыс поштасына кіре алмай қалған еді. Себебі — Microsoft 365 желілік шлюздеріне арналған Windows жаңартуындағы жасырын қате. Шлюздер деп адамдар Outlook пен компанияның басқа қызметтеріне қосылатын серверлерді айтады. Бұл жаңартуды орнату шілдеде басталған, ол үш айдан астам уақыт ешқандай ақаусыз жұмыс істеген. Есептегі күн — 20 қараша, оны клиенттерге АҚШ уақытымен сол күні кешке, яғни Астана уақытымен 21 қарашада таңертең жіберген.

Қате тек жаңа, қуаттырақ серверлерде ғана байқалды. Машинаның ядролары мен бір мезгілдегі сұраныстары неғұрлым көп болса, Windows ішіндегі процестер бір-бірін соғұрлым қатты бұғаттап, ақыры сервердің процессор ресурсы мен жады таусылған. Ал Microsoft жүктеме сынақтарын ядролары аз ескі жабдықта жүргізген. «Біздің сынағымыз осы инцидент кезінде кездескен жабдық пен трафик құрамының үйлесімін тиісті деңгейде көрсетпеді», — деп мойындады компания.

Қате 12 қарашада Microsoft үшін әдеттегі үш жағдай қатар келгенде іске қосылды. Шлюз қуатының 14%-ға жуығы жоспарлы қызмет көрсетуге, яғни сервистің жаңа нұсқасын орнатуға ажыратылған еді. Астана уақытымен сағат 06:07 шамасында US East өңіріндегі маршруттау ақауына байланысты Teams-тің бүкіл әлемдік трафигі поштаға қызмет көрсететін серверлерге автоматты түрде ауысты. Ал Астана уақытымен сағат 21:00 шамасында Солтүстік Америкадағы жүктеме тәуліктік шыңына жақындағанда жаппай істен шығу басталды. Есепке сәйкес, жасырын қате болмағанда бұл жағдайлар ақау тудырмас еді.

Іркілісті әлемге оны тежеуге тиіс жүйелердің өзі таратып жіберді. Серверлер жауап беруді тоқтатқанда, автоматика олардың трафигін көршілес серверлерге аударды, бірақ оларда да дәл сол қате болғандықтан, олар да шыдамады. Ең ауыр сәтте Солтүстік Америкадағы шлюз серверлерінің 80%-дан астамы жауап бермеген, ал онда бос қуат таусылған соң трафик басқа өңірлерге кеткен. Шамамен екі сағатта іркіліс әлемнің барлық өңіріндегі серверлерге жеткен. Қалпына келтіру ұзаққа созылды: қайта қосылған серверлерді жиналып қалған жүктеме бірден басып қалып отырды, ал бірнеше ай бұрын енгізілген өзгерісті әдеттегі тәсілдермен кері қайтару мүмкін болмады. Әр серверді жұмыстан шығарып, қайта жүктеп, түзетуді орнатып, тағы бір рет қайта жүктеуге тура келді.

Есепте мұндай жағдай қайталанбауы үшін 13 шара көрсетілген. Microsoft бір өңірдегі ақау басқа өңірлерге ауыспауы үшін трафикті бөлу тәртібін өзгертіп, шлюзді әр қызметке арналған бөлек пулдарға бөледі, ал Teams бүкіл әлемде емес, тек зардап шеккен өңірде ғана ауысатын болады. Жүктеме сынақтары ең жаңа жабдыққа және шынайы трафикке жақын жағдайларға кеңейтіледі. Шаралардың бір бөлігін 2026 жылдың соңына дейін, енді бір бөлігін 2027 жылғы наурыздың соңына дейін енгізу көзделген, бірқатарының мерзімі әлі белгіленбеген. Бұл жолы клиенттерге алғашқы хабарлама жаппай іркіліс басталғаннан кейін шамамен 20 минуттан соң жіберілген, компания бұл уақытты да жыл соңына дейін қысқартуға уәде беріп отыр.

Пайдаланушылар үшін бұл нені білдіреді. Microsoft мәліметінше, корпоративтік пошта жоғалмаған: кезекте тұрып қалған хаттардың бәрі жеткізілді, ал іркіліс кезінде қайта жеткізу мерзімі 24 сағаттан 48 сағатқа дейін ұзартылды. Тек 30 күннен астам пайдаланылмаған жеке пошта жәшіктеріне жіберілген кешіккен хаттардың бір бөлігі ғана жетпей, жіберушілерге хаттың жеткізілмегені туралы хабарлама келген. Компанияның айтуынша, клиенттердің сақталған деректері зардап шеккен жоқ.

Microsoft есепте кибершабуыл мен жасанды интеллект (ЖИ) нұсқасын тағы да жоққа шығарды: «Инциденттің кибершабуылдан туындамағаны расталды, біз зиянды әрекеттің ешқандай белгісін таппадық. Бұл өзгеріс ЖИ құралдарынан туындаған жоқ». Дәл осыны 13 қарашада Microsoft-тың атқарушы вице-президенті Чарльз Ламанна X желісінде жазған болатын.

https://x.com/clamanna/status/2121363062058070344

Есептегі деректерге сәйкес, іркіліс 12 қарашада Астана уақытымен сағат 21:20-да басталып, клиенттерге әсері 13 қарашада сағат 21:10 шамасында аяқталған. Outlook, Teams, Copilot, SharePoint, OneDrive және Microsoft 365-тің басқа да қызметтері зардап шекті. Downdetector сервисінің иесі Ookla компаниясының есебі бойынша, Microsoft қызметтеріне 7,4 млн рет шағым түскен, бұл — 2026 жылғы ең ауқымды іркіліс. Компания қызметтерді 14 қарашада толық қалпына келтірді, ал кейінірек Microsoft басшысы Сатья Наделла іркілістің алдын алуға болатынын мойындады.

БөлісуTelegramWhatsAppVKFacebookX

Сондай-ақ оқыңыз