Мазмұнға өту
2026 жылғы 22 қараша, жексенбі

Ұлыбритания Украина Қарулы күштеріне алысқа ұшатын украин дрондарын шығарады

Келісімдерге Киевте екі елдің қорғаныс министрлері Евгений Хмара мен Уэс Стритинг қол қойды, ал өндірісті Британия бюджеті қаржыландырады.

Министр обороны Украины Евгений Хмара и министр обороны Великобритании Уэс Стритинг пожимают руки в Киеве

Орташа және алыс қашықтыққа ұшатын украин шабуылдаушы дрондары Ұлыбритания зауыттарында шығарылады, бұл өнімнің бәрі Украинаның қорғаныс күштеріне жіберіледі. Бұл туралы келісімдерге 21 қарашада Киевте Украина қорғаныс министрі Евгений Хмара мен Ұлыбритания қорғаныс министрі Уэс Стритинг қол қойды, деп хабарлады Украина Қорғаныс министрлігі.

Әңгіме дрондардың екі түрі жайында. Middle strike дрондары майдан шебінен шамамен 35–300 шақырым қашықтықтағы нысандарды – Ресей әскерінің жақын тылдағы қоймаларын, артиллерия мен әуе қорғанысы позицияларын, логистикасын соғады. Deep strike дрондары одан да алысқа ұшады: Украина дәл солармен Ресейдің түкпіріндегі мұнай өңдеу зауыттарына, әуеайлақтарға және әскери зауыттарға шабуыл жасайды. Бұл модельдерді Украина әзірлеген, олар ұрыста сыннан өткен, ал Британия өндірістік қуат пен қаржы береді. Украина БАҚ-тарының нақтылауынша, қаржы өткен айда жарияланған 500 млн фунт стерлингтен (шамамен 654 млн доллар) асатын көмек пакетінен бөлінеді.

«Украинада тиімді қорғаныс шешімдері және жаумен күрестің баға жетпес тәжірибесі бар. Оларды Ұлыбританияның өндірістік мүмкіндіктерімен ұштастырып, қорғаныс күштеріміз үшін сыналған құралдарды тезірек көбейтеміз», – деді Хмара.

Кездесуде министрлер әуе қорғанысын да талқылады. Хмара Британияның Украинаға болашақ жеткізілімдер есебінен өз қоймаларынан LMM зымырандарын алғашқылардың бірі болып бергені үшін Лондонға алғыс айтты. Бұл зымырандармен реактивті «шахедтер» – Ресей өзі шығаратын иран шабуылдаушы дрондары атып түсіріледі. Тараптар осы зымырандардың жаңа жеткізілімдерін жеделдетуге келісті, сондай-ақ Украинаның алысқа соққы беру мүмкіндіктерін күшейту және украин зымырандарын жаңғырту жайын сөз етті. Келіссөздерден кейін Украина президенті Владимир Зеленский үйлестіру кеңесін өткізіп, Қорғаныс министрлігі алғашқы тапсырмаларды алғанын, ал Хмара жақын күндері Еуропада кездесулер өткізетінін айтты.

Дрондарды бірлесіп шығару туралы алғашқы келісімге Зеленский мен Британияның сол кездегі премьер-министрі Кир Стармер 2025 жылғы маусымда қол жеткізген. Қазанда Лондон Украинаға 2027 жылға арналған ең ірі қолдау пакетін – 10 млрд фунттан астам қаржыны жариялады. Осы аптада Британия Берлиндегі «ниеттестер коалициясының» кездесуінде Украинаға мыңнан астам алыс қашықтыққа ұшатын шабуылдаушы дрон беретінін мәлімдеген болатын.

БөлісуTelegramWhatsAppVKFacebookX

Сондай-ақ оқыңыз