Мазмұнға өту
2026 жылғы 22 қараша, жексенбі

Үндістанда жалған алкогольден уланып, 16 адам қаза тапты

Оппозиция қаза тапқандар 18-ге жетіп, уланғандар мыңнан асты десе, билік құрған комиссия бір ай ішінде қасіретке кім жол бергенін анықтауы тиіс.

Отравившиеся суррогатным алкоголем пациенты на каталках в приёмном отделении больницы в Манипуре
Фото: Nagaland Post

Үндістанның солтүстік-шығысындағы Манипур штатында жалған алкогольден уланып, 16 адам қаза тапты. Тағы 600-ге жуық адам ауруханада жатыр, оның 12-сі жансақтау бөлімінде ауыр халде. Бұл туралы сенбі күні штат билігі хабарлады.

Улану оқиғаларының басым бөлігі штат астанасы Импхалдан шамамен 75 шақырым оңтүстікке қарай орналасқан Чандел округінің Чакпикаронг ауданында және көршілес Какчинг округінде тіркелді. Алғашқы қаза тапқандар туралы 20 қарашада, жұма күні белгілі болды. Зардап шеккендер Импхалдағы және екі округтегі ауруханаларға жеткізілді. Билік адамдар жалған немесе сұйылтылған ішімдіктен уланған деп отыр.

Полиция алты адамды ұстады. Ішімдіктің құрамында қандай улы зат болғанын анықтау үшін оның үлгілері сараптамаға жіберілді. Манипур үкіметі жоғары деңгейдегі комиссия құрды: ол ішімдіктің қайдан шыққанын анықтап, полиция, дәрігерлер мен акциз қызметінің жұмысын тексеріп, бір ай ішінде баяндама ұсынуы тиіс. Бұл туралы Импхалда өткен баспасөз мәслихатында штаттың акциз, денсаулық сақтау және полиция басшылары айтты.

Штаттың денсаулық сақтау департаменті соңғы екі-үш тәулікте күмәнді жерден алкоголь ішкендердің бәрін, сондай-ақ көзі бұлдырап, құсып, басы айналып, іші ауырған немесе тынысы тарылған адамдарды дереу ауруханаға баруға шақырды. Дәрігерлер үйде өз бетінше емделмеуге кеңес береді, ал қалған бөтелкелер мен қаптамаларды лақтырмауды сұрайды: полиция солар арқылы улы партияны іздеп жатыр. Штаттағы барлық аурухана жоғары әзірлік режимінде жұмыс істеп тұр.

Оппозиция басқа сандарды айтып отыр. Манипур заң шығарушы жиналысындағы Үндістан ұлттық конгресі фракциясының жетекшісі Кейшам Мегхачандра Сингхтің мәлімдеуінше, кемінде 18 адам қаза тапқан, ауруханаға мыңнан астам адам түскен. Оның айтуынша, ішімдікте метанол болған, зардап шеккендердің көбінің бүйрегі істен шығып жатыр. Ол қасіретке штаттың бас министрі өзі жетекшілік ететін акциз ведомствосын кінәлап, тәуелсіз тергеу жүргізуді талап етті.

Үндістанда арзан, қолдан жасалған алкогольден улану жиі болып тұрады. Оның күшін арттыру үшін көбіне метанол қосады, ал ол көз бен бүйрекке зақым келтіріп, адамды өлтіруі мүмкін. Соңғы жылдардағы мұндай ең ауыр қасіреттің бірі 2024 жылғы маусымда Тамилнад штатында болып, онда 50-ден астам адам қаза тапқан.

БөлісуTelegramWhatsAppVKFacebookX

Сондай-ақ оқыңыз