Мазмұнға өту
2026 жылғы 22 қараша, жексенбі

Ангелина Лукас Германиядағы алғашқы жекпе-жегінде толы залда жеңді

Қарсыласы аргентиналық Аньелен Эспиносамен қазақстандық боксшы 2013 жылы Софияда өткен әлем чемпионатынан бері таныс.

Ангелина Лукас после боя в Ландсхуте
Фото: Instagram Ангелины Лукас

Қазақстандық боксшы Ангелина Лукас неміс рингіндегі алғашқы жекпе-жегінде жеңіске жетті. 21 қарашада Ландсхут қаласында өткен XFN 2 – Exaltus Fight Night бокс кешінде ол сегіз раундқа белгіленген кездесуде аргентиналық Аньелен Эспиносаны жеңді. Лукастың өз сөзінше, бұл оның кәсіпқой бокстағы 18-жеңісі.

Боксшы әсерімен жекпе-жектен кейінгі түні әлеуметтік желіде бөлісті. «Сіздерге Германиядан түн ортасында жазып отырмын. Бүгін неміс рингіндегі алғашқы жекпе-жегім өтті. Арена лық толы болды – SOLD OUT! Шынымды айтсам, қатты толқыдым, өйткені Германиядағы алғашқы өнерімде маған жүктелген жауапкершіліктің бәрін сезіндім. Бірақ Жаратқанға шүкір, жеңіске жеттім! Бұл менің кәсіпқой бокстағы 18-жеңісім!» — деп жазды Лукас.

Қазақстандық боксшы қарсыласымен он жылдан астам уақыт таныс. «Маған Аргентинадан келген өте тәжірибелі боксшы қарсы шықты. Біз 2013 жылы екеуміз де Софиядағы (Болгария) әлем чемпионатына қатысқанда танысқанбыз. Оның әуесқойлар арасында да, кәсіпқой деңгейде де өнер көрсетуде мол тәжірибесі бар. Бұл шынымен де мықты спортшы әрі лайықты қарсылас. Ал мен үшін ең үлкен мақтаныш – Қазақстанның атынан шығып, халықаралық аренада елімнің туын көтеру!» — деді ол. Эспиносаның кәсіпқой бокста сегіз жеңісі мен екі жеңілісі бар, бірақ бұл кешке дейін ол 2020 жылдың ақпанынан бері рингке шықпаған.

Лукас үшін Германиядағы жекпе-жек ерекше болды: сапар алдында ол мұны тарихи отанына оралу деп атаған. 2024 жылдың қазанында қазақстандық боксшы аргентиналық Дебора Лопесті төрешілердің бірауызды шешімімен жеңіп, екінші ең жеңіл салмақта IBO нұсқасы бойынша әлем чемпионы белбеуін иеленген.

БөлісуTelegramWhatsAppVKFacebookX

Сондай-ақ оқыңыз