«Ақтөбенің» және Қазақстан құрамасының шабуылшысы Артур Шушеначев әзірге клубын ауыстырмақ емес. Бұл туралы оның өкілі Сергей Цырин ASnews.kz-ке берген сұхбатында айтып, шабуылшының Еуропа мен Таяу Шығыс клубтарына ауысуы туралы қауесеттерге жауап берді.
«Иә, әлеуметтік желілерде қауесет тарап жатқанын көріп жүрмін. Жанкүйерлер де маған осы сұрақпен жазып жатыр. Түсіндіріп айтайын: Артурдың «Ақтөбемен» келісімшарты күшінде. Қазіргі уақытта клубты ауыстыру жоспарымыз жоқ», — деді Цырин.
Агенттің айтуынша, ойыншыға әзірге ресми ұсыныс түскен жоқ, алайда нарықпен байланыс үзілген емес. «Бірақ әртүрлі агенттермен, Еуропа, Азия, Ресей және Қазақстан клубтарының өкілдерімен әңгіме үнемі жүріп жатады. Футбол өмірі осындай», — деді ол.
Дегенмен трансферге жол жабық емес. «Артурдың келісімшартында белгілі бір өтемақы сомасы көрсетілген, сондықтан қандай да бір салмақты команда оны төлеуге дайын болса және жеке шарттар бізді қызықтырса, ештеңе жоққа шығарылмайды. Бірақ Шушеначев тек ақша үшін ауыспайды», — деп толықтырды Цырин.
28 жастағы Шушеначев «Ақтөбеге» 2025 жылғы шілдеде ауысқан. Ол клуб сапында 44 ойын өткізіп, 18 гол соқты және жеті нәтижелі пас берді. Шабуылшының келісімшарты 2027 жылдың соңына дейін жасалған. Ақтөбеліктер маусымаралықта құрамды белсенді жасақтап жатыр: инсайдердің дерегінше, клуб Қазақстан құрамасының ойыншыларымен келіссөз жүргізіп жатыр.



