Бундестаг 13 қарашада Германия арнаулы қызметтеріне тек мәлімет жинап қана қоймай, қарсыластарына белсенді түрде кедергі келтіруге, мысалы, олардың серверлерін бұзып, өшіруге рұқсат беретін реформаны қабылдады. Заңды 308 депутат қолдап, 190 депутат қарсы дауыс берді, 71 депутат қалыс қалды. Реформаны билеуші христиан-демократтар мен социал-демократтар қолдады, ал «Германия үшін балама» мен «Солшылдар» партиялары қарсы шықты.
Федералдық барлау қызметі (BND) шетелде бөгде IT-жүйелерге ене алады, хакерлік топтардың, соның ішінде мемлекеттер үшін жұмыс істейтін топтардың серверлерін өшіріп, қарсыластың цифрлық инфрақұрылымының жұмысын бұза алады. Euronews жазғандай, заң дрондар немесе химиялық қару әзірленетін нысандарға қарсы шараларды да қарастырады. Ел ішінде жұмыс істейтін Конституцияны қорғау федералдық ведомствосы (BfV) деректер ағынына араласып, цифрлық ақпаратты өзгерте және жоя алады — мысалы, шабуылдаушылардың серверінен ұрланған деректерді өшіре алады. Ерекше жағдайларда және рұқсатпен оның қызметкерлері тұрғын және тұрғын емес үй-жайларға жасырын кіре алады. Сондай-ақ екі қызмет те үлкен көлемдегі деректерді өңдеу мен бет-әлпетті тану үшін жасанды интеллектіні пайдалана алады.
Ішкі істер министрі Александр Добриндт заңды «ғасыр реформасы» деп атады. Оның сөзінше, заң неміс арнаулы қызметтерін еуропалық әріптестерімен бір деңгейге қояды. Үкімет арнаулы қызметтерді қадағалайтын тәуелсіз кеңес құрып, парламенттік бақылауды кеңейтуге уәде беріп отыр.
Реформаны оппозиция мен заңгерлер сынап жатыр. «Солшылдар» Германияда жаңа «құпия полиция» пайда болатынын ескертеді: ГДР-да өмір сүргендер үшін бұл Штазиді еске салады. «Жасылдар» партиясы барлау мен полиция арасындағы шекара әлі де бұлыңғыр екенін айтады, ал депутат Константин фон Нотц BfV-ның жаңа өкілеттіктері Конституциялық соттың тексеруінен өтетініне күмәнданады. Германия адвокаттар одағы адвокаттық құпияның сақталуына алаңдайды.
Заң Лейпциг/Галле әуежайындағы оқиғадан бірнеше ай өткен соң қабылданды: тамызда онда украиналық Antonov Airlines компаниясының жүк ұшағының жанынан жарылғыш зат тиелген дрон табылған. Берлин шабуыл жасауға әрекеттенді деп Ресейді айыптады, Мәскеу бұған қатысы жоқ екенін айтып отыр. Осыдан кейін Германия Ресейдің Бонндағы бас консулдығы мен Берлиндегі Орыс үйін жапты, ал Ресей Германияның Петербургтегі бас консулдығы мен Гёте институтын жапты.
Реформаның негізгі ережелері заң шығару үдерісі аяқталған соң, 31 желтоқсанда күшіне енуі тиіс.
