Осы қыста және көктемде Таиландқа ұшатын қазақстандықтарға жаңа кіру алымын төлеудің қажеті жоқ. Ұшақпен келетін шетелдіктерге арналған 450 бат (шамамен 6 мың теңге) алымды қазіргі кесте бойынша 2027 жылдың маусымы мен шілдесінен бұрын жинай бастамайды. Таиландтың Туризм және спорт министрлігі бастапқыда оны 2027 жылдың бірінші тоқсанында енгізуді жоспарлаған еді.
Жобаның алдында әлі бірнеше қадам бар. 12 қарашада құжатты Ұлттық туризм саясаты жөніндегі комитет соңғы рет қарайды, ал келесі аптада министрлік оны үкіметке енгізбек. Министрлер кабинеті мақұлдағаннан кейін құжат «Корольдік хабаршы» ресми басылымында жариялануға тиіс. Одан кейін 180 күндік өтпелі кезең басталады, алым соның соңында ғана күшіне енеді. Министрліктің тұрақты хатшысы Наттрия Тхавивонгтың сөзінше, жоба әлі пысықталып жатыр: кімді төлемнен босату керек, ақшаны қалай жинайды, техника бұған дайын ба — осының бәрі қарастырылуда.
Алымды елге ұшып келетін шетелдік туристер төлейді. Жоба бойынша жұмысқа рұқсаты барлар, дипломатиялық және қызметтік паспорт иелері, шекара маңындағы тұрғындарға берілетін рұқсатнаманың иелері, сондай-ақ транзит жолаушылар, экипаж мүшелері және екі жасқа дейінгі балалар алымнан босатылады. Министрлік алымды әуе билетінің бағасына қосуды ең оңай жол деп санайды: авиация қызметтерімен, соның ішінде Airports of Thailand мемлекеттік компаниясымен жүргізілген келіссөздер жүйенің бұған дайын екенін көрсетті.
Ақшаның бір бөлігі Таиландта ауырып қалған немесе апатқа ұшыраған шетелдіктерді сақтандыруға, қалғаны туризмді дамыту қорына жұмсалады. Министрлік 24 тамыз бен 28 қыркүйек аралығында өткізген онлайн-сауалнамада 5954 қатысушының 78,3%-ы 450 бат мөлшерін қолдады. Туризм және спорт министрі Сурасак Панчароенворакун мұндай алымды қазір 80-нен астам ел алатынын еске салды.
Барлық жолаушы, соның ішінде тайлықтардың өздері де төлеуге тиіс болған 1000 баттық елден шығу салығын Таиландтың Қаржы министрлігі қазан айында белгісіз мерзімге кейінге қалдырды. Ал халықаралық рейсқа арналған әуежай алымы қымбаттап үлгерді: 2026 жылғы 20 маусымнан бастап Airports of Thailand компаниясының алты әуежайында ол 1120 батқа (шамамен 15 мың теңге) жетті, бұл сома билет бағасына кіреді.
Қазір Қазақстан азаматтары Таиландта визасыз бір сапарда 30 күнге дейін, ал жалпы алғанда 180 күн ішінде 90 күннен аспайтын мерзімде бола алады. Ұшар алдында TDAC электрондық келу картасын толтыру керек.
