Бас прокуратура «Қазпошта» атынан жаппай таратылып жатқан жалған хабарламалар туралы ескертті. Алаяқтар сәлемдеме жақында жеткізілетінін айтып, «жеткізу мекенжайын нақтылау» үшін сілтемеге өтуді сұрайды. Шын мәнінде сілтеме жалған сайтқа апарады, онда адамның дербес деректерін алдап алады. Ведомство мұндай хабарламаларды 9 қарашадан бері тіркеп отыр.
Схема былай жұмыс істейді. Хабарлама көбіне +212 6 12 82 15 27 шетелдік нөмірінен келеді, бірақ прокуратураның айтуынша, басқа нөмірлер де қолданылуы мүмкін. Мәтін мемлекеттік тілде, ресми-іскери стильде жазылған. Оған сілтемені қалай ашып, «жетіспейтін деректерді» қалай толтыру керегі туралы толық нұсқаулық қоса берілген. Сілтеме арқылы ашылатын бет пошта қызметіне ұқсатып жасалған, бірақ оның «Қазпоштаға» еш қатысы жоқ. Бұл – фишинг, яғни өзгенің деректерін жинайтын жалған сайт: ондағы нысанға үй мекенжайын және басқа да құпия мәліметтерді жазу талап етіледі.
Бас прокуратураның айтуынша, таратылымды сенімді етіп көрсететін нәрсе – қазақ тілі, іскери сарын және шынайы пошта хабарламаларына ұқсас безендіру. Зардап шеккендердің саны мен ықтимал шығынды ведомство атаған жоқ. Төменде – Бас прокуратураның Telegram-арнасында жарияланған ескерту.
Алаяқтар жеткізу қызметін бүркеме ретінде бірінші рет пайдаланып отырған жоқ. Бұған дейін Бас прокуратура жалған курьерлер адамдардан SMS-кодтарды алдап алатын жалған жеткізу схемасы туралы ескерткен еді. Ал 6 қарашада Ұлттық банк өз бланкісімен жасалған жалған хаттар туралы хабарлады. «Қазпошта» – Қазақстанның ұлттық пошта операторы, ол шетелдік интернет-дүкендерден келетін сәлемдемелерді де жеткізеді.
Мұндай хабарлама келсе, не істеу керек:
- «сәлемдеме» туралы SMS пен мессенджерге келген хабарламалардағы сілтемелерге өтпеңіз, әсіресе олар бейтаныс және шетелдік нөмірлерден келсе;
- мұндай сілтеме арқылы ашылған сайттарға дербес және банк деректеріңізді енгізбеңіз;
- жөнелтілімнің қай жерде екенін өзіңіз тексеріңіз – «Қазпоштаның» ресми сайты post.kz немесе оның қосымшасы арқылы;
- карта деректерін енгізіп қойсаңыз, картаның артқы бетіндегі нөмір арқылы банкке дереу хабарласып, картаны бұғаттаңыз, ал алаяқтық әрекеті туралы 102 нөміріне қоңырау шалып, полицияға хабарлаңыз.
