Қазақстан Конституциялық Соты педагогты моральға жат қылығы үшін жұмыстан шығаруға мүмкіндік беретін Еңбек кодексінің нормасын қарап, бұл ұғымның қолдануға жеткілікті құқықтық айқындылығы бар деген қорытындыға келді. Бұл туралы Конституциялық Сот хабарлады.
Сөз Еңбек кодексінің 52-бабы 1-тармағының 14) тармақшасы туралы болып отыр. Ол тәрбие беру функцияларын атқаратын жұмыскер жұмысты жалғастыруға сыйымсыз моральға жат қылық жасаса, онымен еңбек шартын бұзуға мүмкіндік береді.
Сотқа педагогикалық әдеп жөніндегі кеңестің шешімімен жұмыстан шығарылған мектеп қызметкері жүгінді. Ол бұған дейін келісу комиссиясы мен сотқа шағымданған, бірақ шешімдер өзгеріссіз қалған. Өтініш берушінің пікірінше, заңда моральға жат қылықтың нақты белгілері мен объективті өлшемдері жоқ, сондықтан норманы тым кең түсіндіруге болады, ал бұл оның еңбек ету және сот арқылы қорғалу құқығын бұзады.
Конституциялық Сот бұл уәжбен келіспеді. Шешімде заңнама адамгершілік бағдарларды, соның ішінде педагогикалық әдептің ерекше талаптарын және оларды бұзғаны үшін жауапкершілікті бекітетіні айтылған. Сот түсіндіргендей, «моральға жат қылық» ұғымы табиғатынан бағалаушы сипатта. Сондықтан оны тыйым салынған әрекеттердің жабық тізбесімен толық сипаттау мүмкін емес: баға нақты жағдайдың мән-жайына, оның әлеуметтік, мәдени және кәсіби контекстіне байланысты. Сот сондай-ақ өтініш берушінің құқығын қорғаудың заңда көзделген тәсілдерін пайдаланғанын атап өтті.
