16 қарашаға қараған түні Таиландтың Пхукет аралында мотоцикл сататын әрі жалға беретін ғимарат өртенді. Бұл — Патонг курорттық ауданы. Патонг мэрінің орынбасары Санакорн Кисиннің айтуынша, өрттен 11 адам қаза тауып, тағы 36 адам зардап шекті. Жалын көршілес үйлерге тарап, барлығы бес сауда орны зақымданды.
Өрт жергілікті уақытпен шамамен сағат 03:15-те (Астана уақытымен 01:15-те) басталды. Ғимараттың бірінші қабатында жүзден астам мотоцикл тұрған, ал жоғарғы қабаттарда тұрғын бөлмелер болған. Жанармай, шина мен пластик жанып, қою қара түтін шықты. Тұрғындардың бір бөлігі жоғарғы қабаттарға көтеріліп, құтылмақ болды, бірақ түтін олардың жолын кесіп тастады. Санакорнның сөзінше, қаза тапқандардың біреуі үшінші қабаттан, қалған оны бесінші қабаттан табылды. Алдын ала мәлімет бойынша, олардың көбі түтіннен уланған. Зардап шеккендердің бәрі ауруханаға жеткізілді.
Муниципалитеттің өрт сөндірушілері жаңбырға қарамастан шамамен бес минутта жетті. Оларға Kusoldharm қорының еріктілері мен Патонг ауруханасының жедел жәрдем көліктері көмектесті. Құтқарушылар жанып жатқан ғимараттардан 15–20 адамды шығарды. Түтін мен тез жанатын заттардың кесірінен өртті сөндіруге бір сағаттан астам уақыт кетті. Сымдарда ұшқын шығып тұрғандықтан, кейін өрт сөндірушілер орынды тағы тексерді.
Өрттің себебін Патонг полициясы анықтап жатыр. Мэр орынбасарының алдын ала болжамынша, көршілес электр бағанында қысқа тұйықталу болған: ұшқындар жанында тұрған мотоциклдерге түсіп, оларды тұтандыруы мүмкін. Келтірілген залалдың көлемі әзірге есептелмеген.
Пхукет полициясының мәліметінше, қаза тапқандар мен зардап шеккендердің арасында шетелдік туристер жоқ. Пхукет — қазақстандықтар ең көп баратын бағыттардың бірі: ҚР СІМ дерегінше, 2025 жылы Таиландқа 200 мыңға жуық Қазақстан азаматы барған, ал аралға Алматыдан тікелей рейстер ұшады. 2026 жылғы қаңтардан бері Пхукетте Қазақстанның консулдығы жұмыс істейді, ол Таиландтың оңтүстігіндегі 14 провинцияны қамтиды.
Патонгтағы өрт Бангкоктағы барда кемінде 27 адам қаза тапқан өрттен төрт ай өткен соң болды.



