Stray Kids тобының мүшесі Ли Ноу әскерге кетпес бұрын алғашқы жеке альбомын шығарады. Бұл туралы 12 қарашада корейлік Newsen басылымы хабарлады, ал JYP Entertainment агенттігі жаңалықты Dispatch басылымына растады: «Ли Ноу жеке альбом дайындап жатыр және оны 2027 жылдың басында шығаруды жоспарлап отыр». Бұл топ мүшелері арасындағы алғашқы ресми жеке дебют болмақ.
Dispatch мәліметінше, альбом жұмысы аяқталуға жақын: Ли Ноу мұқабаға арналған фотосессиядан өтіп қойған, ал бейнебаянның бір бөлігі қазан айында түсірілген. Альбом қаңтарда шығады деп күтілуде, алайда JYP әзірге нақты күнін атаған жоқ.
Әскерге шақыру туралы агенттік 5 қарашада хабарлаған еді: Ли Ноу 2027 жылдың бірінші тоқсанында міндетті әскери қызметке аттанады және Stray Kids мүшелерінің ішінде әскер қатарына бірінші болып қосылады. Қызметтің нақты күні мен түрін JYP кейін бөлек жариялайды. Агенттік әншінің жыл басында топтың кейбір іс-шараларына қатыса алмауы мүмкін екенін ескертті, бірақ ол әскерге кеткенге дейін жеке жобалары арқылы STAY деп аталатын жанкүйерлерімен байланыста болады.
Осы уақытта Stray Kids ауқымды RUN IT стадион турына дайындалып жатыр: 2027 жылы топ Солтүстік Америка мен Еуропада өнер көрсетеді, ал соңғы концерт 31 шілдеде Миландағы «Сан-Сиро» стадионында өтеді.
Ли Ноу (шын аты – Ли Мин Хо) 1998 жылы туған, топта хореография мен вокалға жауап береді. JYP агенттігіне келмес бұрын ол BTS тобының концерттерінде биші болып өнер көрсеткен. Stray Kids 2018 жылы дебют жасап, жаңа буын K-pop топтарының ең табыстыларының біріне айналды: олардың альбомдары америкалық Billboard 200 чартының бірінші орнына талай рет көтерілді.
