Оңтүстіккореялық актер Ли Чон Сок «Императрицаның екінші некесі» сериалының режиссері түсірілім кезінде ескертусіз одан шешінуді сұрағанын айтты. Ол бұл туралы YouTube-тағы MMTG шоуында мәлім етті. 12 қарашада бағдарламаға Disney+ жобасының бас құрамы түгел келді.
«Режиссер түсірілім кезінде кенет: „Осы жерде былай шешінсең жақсы болар еді“, — деп өтінді. Камера аяқтан бастап жоғары қарай сырғыды, ал мен тіпті аяғымды қырмаған едім», — деп еске алды 37 жастағы актер. Оның айтуынша, сол сәтте ол өз кейіпкері ханзада Хайнри мен түкті аяқтың «онша жараса қоймайтынын» да ойлаған.
Ли Чон Сок режиссер оны жобаға шақырған кезде «ештеңе дайындаудың қажеті жоқ» деп уәде бергенін мойындады. «Содан кейін ашық сахнаны қашан тағы түсіретінін білмегендіктен, үнемі өзіме қарап жүруге тура келді», — деді актер және әзілмен: «Режиссерден осындай қорлық көрдім», — деп қосты.
Шоу жүргізушісі Джэджэ сюжет бойынша Хайнри құстан адамға айналған сайын кадрда жалаңаш көрінетінін еске салды. «Бұл шынымен өкінішті», — деп жауап берді Ли Чон Сок.
Ашық костюмдер тек оған ғана бұйырған жоқ. Императрица Навьерді сомдаған Шин Мин А: «Се Ён де, мен де көйлек сырғып түсіп кетпесін деп абай болуымыз керек еді… Ал Чу Джи Хун кадрға шыққан сәттен бастап бұған мүлде алаңдамады», — деді. Чу Джи Хунның өзі жартылай мөлдір киімін еске алды: «Бұл мүмкін бе? Осынша мөлдір болуға бола ма?»
Император Совьешу рөлін сомдаған актер жанкүйерлер қойған лақап атқа да шағымданды. «Түпнұсқаның жанкүйерлері оны Совьешу деп атамайды. „Кэвьешу“ деп атайды… Мен мұны қабылдадым», — деді ол. Корей тіліндегі «кэ» сөзі «ит» дегенді білдіреді, ал сленгте бұл қосымша балағат сияқты естіледі.
«Императрицаның екінші некесі» (The Remarried Empress) шамамен 3 млрд рет қаралған веб-комикс негізінде түсірілген. Император Совьешу қашқын құл Рашта үшін Навьерден ажырасуға бел буады, Раштаны Ли Се Ён ойнайды. Императрица жауап ретінде жаңа некеге — Батыс корольдігінің ханзадасы Хайнриге тұрмысқа шығуға рұқсат сұрайды.
10 сериядан тұратын сериал Disney+ платформасында 3 қарашадан бастап шығып жатыр, финалы 25 қарашада көрсетіледі. Алғашқы үш күнде ол әлем бойынша Disney+ жергілікті түпнұсқа жобаларының ішінде ең көп қаралған жоба атанды.
Ли Чон Сок «Мен сенің дауысыңды естимін», «Пиноккио» және «Үлкен ауыз» дорамаларымен танымал. Соңғысындағы рөлі үшін ол 2022 жылы MBC Drama Awards сыйлығының бас жүлдесін алды.
