«Есігімді қақ» сериалының жұлдызы, түркиялық актриса Ханде Ерчел 13 қарашада кешке Дубайда тарихта алғаш рет өткен Vogue Arabia балына қатысты, деп жазады түрік Onedio порталы. Art Edition деп аталған кеш Bluewaters аралындағы Delano Dubai қонақүйінде өтіп, сән, өнер және шоу-бизнес әлемінің өкілдерін жинады.
Ерчел бұл балға ол өтпей тұрып-ақ қатысты болды: қазан айының соңында журнал актриса түскен Art Is All Around Us промо-фильмін жариялады. Фильмді режиссер Линн Моркос Дубайдағы AYA Universe цифрлық өнер орталығында түсірген.
Актриса балға иығы ашық, қызғылт гүл кестесі мен қауырсындары бар қара көйлекпен келді. Үлпілдек етегі ұзын шлейфке ұласты. Onedio мәліметінше, бұл – Zuhair Murad сән үйінің 2026 жылғы күз-қыс кутюр коллекциясындағы көйлек, бірақ мұны ресми түрде растаған ешкім жоқ. Балдағы суреттер түрік әлеуметтік желілерінде тез тарады. Mynet атап өткендей, жанкүйерлер суреттердің астына «Көз тартарлық әрі салтанатты», «Керемет көрінеді» деп жазды.
Бал Ерчел үшін осы аптада Дубайда өткен жалғыз шара болған жоқ. Бір күн бұрын ол белгілі сағат бренді ұйымдастырған падел бойынша халықаралық турнирге қатысты.
Ханде Ерчел 32 жаста. Оған әлемдік танымалдылықты Керем Бүрсинмен бірге ойнаған «Есігімді қақ» (Sen Çal Kapımı, 2020–2021) сериалы әкелді. Ол сондай-ақ «Махаббат сөзді түсінбейді» және «Мүлде басқа адам» сериалдарында түсті. Ерчел – Instagram-да ең көп жазылушысы бар түрік актрисасы, 2025 жылдан бері ол италиялық Pomellato зергерлік брендінің жаһандық елшісі.
