Мазмұнға өту

1113 МВт-тық «Түркістан» БГҚ 2027 жылғы мамырда ток береді

Бірінші вице-премьер Нұрлыбек Налибаев құрылыс-монтаж жұмыстары әзірге 62 пайызға ғана орындалғанына қарамастан, станцияны 2027 жылдың соңына дейін толық қуатқа шығаруды ұсынды.

Первый вице-премьер Нурлыбек Налибаев осматривает строительство парогазовой установки в Туркестанской области
Фото: акимат Туркестанской области

«Түркістан» бу-газ қондырғысының 382 МВт-тық бірінші кезегі 2027 жылғы мамырда, тағы 382 МВт-ы тамызда электр энергиясын беруі тиіс. Бұл кесте 20 қарашада Премьер-министрдің бірінші орынбасары Нұрлыбек Налибаевтың Түркістан облысына жұмыс сапары кезінде айтылды, деп хабарлады облыс әкімдігі. Сайрам ауданындағы станцияның жалпы қуаты 1 113,4 МВт, ал Налибаев оны 2027 жылдың соңына дейін толық қуатқа шығаруды ұсынды.

Қазір құрылыста 2 455 адам жұмыс істейді. Негізгі жабдықтың бәрі, оның ішінде Siemens-тің төрт газ турбиналық қондырғысы орнатылды. Құрылыс-монтаж жұмыстары 62 пайызға, электр желілері 96 пайызға дайын, газ құбыры салынды, ұзындығы 3,1 шақырым кірме жол пайдалануға берілді. Жеті ұңғыманың екеуі тәулігіне 960 текше метр су беріп отыр, ал бірінші кезекке қажеттісі – 240 текше метр.

«Құрылыс созылмауы керек, жұмысты белгіленген мерзімде аяқтау қажет», – деді Налибаев.

Сол күні бірінші вице-премьер Түлкібас ауданындағы «Састөбе» химия кешенін де аралады. Онда жыл сайын 400 мың тонна әк, 100 мың тонна каустикалық сода, 120 мың тонна ПВХ, 200 мың тонна кальций карбиді және 1 млн тонна цемент өндіру жоспарланған. Әк шығаратын желі өткен жылы іске қосылды, келесі кезеңдердің мерзімі қаржыландыруға байланысты қайта қаралды. Мемлекеттік органдарға қаржы көзін тауып, инженерлік инфрақұрылымды салып бітіру тапсырылды.

Станция Мемлекет басшысының тапсырмасымен салынып жатыр. Ол ұлттық энергия жүйесінің сенімді жұмысын қамтамасыз етуге арналған және төрт газ, екі бу турбинасымен жабдықталады.

БөлісуTelegramWhatsAppVKFacebookX

Сондай-ақ оқыңыз