Банк немесе микроқаржы ұйымы азаматтың кредиті не микроқарызы бойынша проблемалық берешегін кешірсе, бұл сомаға жеке табыс салығы салынбайды. Салық кодексіне осындай түзетуді Премьер-министрдің орынбасары – ұлттық экономика министрі Серік Жұманғариннің төрағалығымен өткен Салық кодексін енгізу жөніндегі жобалық кеңсенің 30-отырысы мақұлдады, деп хабарлады Ұлттық экономика министрлігі. Түзету Салық кодексіне енгізілетін өзгерістердің жалпы топтамасына қосылады.
Қазір банктер проблемалық берешекті жылына несие портфелінің 10%-ы шегінде провизияларды азайтудан түскен табысты мойындамай кешіре алады, ал микроқаржы ұйымдары үшін бұл шек 20%-ды құрайды. Енді осы лимиттерді екі есе, тиісінше 5% пен 10%-ға дейін азайту ұсынылып отыр. Жаңа лимит шегінде есептен шығарылған қарызға ЖТС салынбайды, қарыз алушыға ешқандай қосымша талап қойылмайды. Кредитор лимиттен асып кетсе, артық сомаға провизияларды азайтудан түскен табысты мойындап, одан ЖТС-ты салық агенті ретінде өзі төлейді.
Қолданыстағы ереже бойынша кешірілген қарыз қарыз алушының табысы саналады, сондықтан оған салық салынады. Жобалық кеңсе бұл мәселені бірнеше рет қарап, түрлі нұсқаларды талқылады. Ақыры қатысушылар азамат кредитін төлей алмайтын барлық жағдайды заңда тізіп шығу іс жүзінде мүмкін емес деген қорытындыға келіп, бәріне ортақ бірыңғай тәсілді таңдады.
Сол отырыста жеңіл өнеркәсіпке арналған салық жеңілдіктері де мақұлданды. Олар саланы дамытудың 2026–2030 жылдарға арналған кешенді жоспарында қарастырылған. Кәсіпорын Өнеркәсіп және құрылыс министрлігімен өндірісті жергіліктендіруді арттыру туралы келісім, кейін арнаулы инвестициялық келісімшарт жасаса алады. Бұл келісімшарт жер салығы, мүлік салығы, жер учаскелерін пайдаланғаны үшін төлем және корпоративтік табыс салығы бойынша жеңілдік береді. Келісім кәсіпорынның кінәсінен бұзылса, жеңілдіктер бұзушылық жіберілген салық кезеңінің басынан бастап жойылады. Ол үшін салалық заңнамаға да өзгеріс енгізу қажет.
Жеңіл өнеркәсіп кәсіпорындары қауымдастығының өкілі Салтанат Әбдікәрімова тігін өндірістері мата әкелгенде ҚҚС-ты бірден әрі толық төлейтінін, ал дайын өнімнің ақысы тапсырыс берушіден кейде тоғыз айдан кейін ғана түсетінін айтты. Мемлекеттік кірістер комитеті Қазақстанда өнім шығаруға жұмсалатын маталарды импорттауға ҚҚС-ты бөліп төлеудің қазір жұмыс істеп тұрған тетігін қолдануды ұсынды.
Жаңа Салық кодексі 2026 жылғы 1 қаңтардан бастап күшіне енді. Ұлттық экономика министрлігі басқаратын жобалық кеңсе оны қолдану кезінде туындаған мәселелерді қарап, соларға түзетулер дайындап отыр.



