20 қарашада сағат 17:00-ден бастап Астанадан Павлодарға қарай баратын тас жолдың елордадан Шідерті кентіне дейінгі бөлігі көліктің барлық түріне жабылды. Себебі — ауа райының нашарлауы, деп хабарлады «ҚазАвтоЖол» ҰК» АҚ. Жолды шамамен 21 қарашада сағат 09:00-де ашу жоспарланып отыр.
Шектеу Астана — Шідерті — Павлодар — Успенка — Ресей шекарасы тас жолының екі облыстағы бөлігінде енгізілді:
- Ақмола облысында — 16–200 шақырым аралығы, Астанадан Павлодар облысының шекарасына дейін;
- Павлодар облысында — 200–254 шақырым аралығы, Ақмола облысының шекарасынан Шідерті кентіне дейін.
Бұл учаске қатарынан екінші түн жабылып отыр. Бір күн бұрын, 19 қарашада, Астана — Павлодар тас жолы сағат 18:00-ден 20 қараша таңына дейін жабылған еді. Бұл жолы шектеу бір сағат ерте, 17:00-де енгізілді.
Алдағы күндері ауа райы жақсара қоймайды. Астана қаласының Төтенше жағдайлар департаменті 21 қарашада елордада мезгіл-мезгіл тұман түсіп, көктайғақ болатынын ескертті. Қазгидромет болжамы бойынша, 21–23 қарашада елдің басым бөлігіне солтүстік-батыстан келетін циклондар легі әсер етеді: солтүстік-батыс пен солтүстікте жаңбыр аралас қар жауады, солтүстікте көктайғақ күтіледі, республика бойынша жел күшейіп, тұман түседі.
Тас жолдың ашылу уақыты шамамен ғана белгіленген және ауа райына байланысты, деп нақтылайды «ҚазАвтоЖол». Жолдың ашық-жабығын тәулік бойы 1403 нөмірі арқылы білуге болады. Жолда төтенше жағдай болса, 112-ге хабарласыңыз.



