2026 жылғы қаңтар–қыркүйекте Тұтынушылардың құқықтарын қорғау комитеті қазақстандық сатып алушылардың 2,17 млрд теңгеден астам сомаға мүліктік құқықтарын қорғады, деп хабарлады Сауда және интеграция министрлігі. Ең көп қаражат Алматы, Астана және Шымкент тұрғындарына қайтарылған.
Тоғыз айда комитет пен оның өңірлік департаменттеріне 72 мыңнан астам өтініш түскен. Оның 43%-ға жуығы, яғни 31 186 шағым бөлшек саудаға қатысты. Екінші орында электрондық сауда тұр: 12 264 өтініш немесе 16,9%. Тағы 7 065 шағым (9,7%) тұрмыстық қызмет көрсету саласына тиесілі.
Тұтынушылардың талабы шамамен 23 мың жағдайда қанағаттандырылды, тағы 26 мыңға жуық адам заң көмегін алды. Ведомство 107 резонансты істі бөлек қарады: олар бойынша 365 азаматтың шамамен 1,03 млрд теңгелік құқығы қорғалды.
Бизнесті тексеру жиілеген. Тоғыз айда 1 347 жоспардан тыс тексеру жүргізілді, бұл өткен жылдың осы кезеңінен 42,2% көп. Тексеру нәтижесінде 1 836 әкімшілік іс қозғалып, 54,3 млн теңге айыппұл салынды.
Бірінші тоқсанда комитет 22 мыңнан астам өтінішті қарап, тұтынушыларға 405,6 млн теңге қайтарған еді. Ол кезде шағымдардың 18,3%-ы интернеттен сатып алу мен маркетплейстерге қатысты болған. Сатушы тауарды қайтарудан немесе ауыстырудан бас тартса, сатып алушы комитетке eOtinish арқылы шағым түсіре алады немесе мемлекеттік баж төлемей сотқа жүгіне алады.
