8 қарашада Мәскеуден Алматыға ұшқан SCAT әуе компаниясының ұшағы Астанаға жоспардан тыс қонды: ұшу кезінде борттық жүйенің индикациясы іске қосылған. Зардап шеккендер жоқ, жолаушыларды Алматыға резервтік ұшақпен жеткізді.
Әуе компаниясының айтуынша, SCAT-тың базалық әуежайы орналасқан Астанаға қонуды DV 1008 рейсінің экипажы шешкен, ұшақ қалыпты режимде қонған. Қай жүйе белгі бергенін компания нақтыламады. Тасымалдаушының түсіндіруінше, мұндай индикация техникалық қатені, ақауды немесе жабдық жұмысы режимінің өзгергенін білдіруі мүмкін.
Жолаушылардың наразылығын ең көп тудырғаны — қонғаннан кейінгі жағдай. Солардың бірі Threads желісінде адамдарды сусыз, тамақсыз ұстағанын, әрі қарай қашан ұшатынын ешкім айтпағанын, ал сусынды жолаушылар ашуланғаннан кейін ғана ұсынғанын жазды. SCAT қолайсыздық үшін кешірім сұрап, кідірісті былай түсіндірді: «Барлық жолаушыға су беру үшін алдымен оны әуежайға жеткізуді ұйымдастыру керек болды. Сондықтан бұған уақыт кетті». Компания жолаушылар резервтік ұшақты күтіп отырғанда оларға салқын сусын таратылғанын да айтты.
Әуе тасымалдары қағидаларына сәйкес, ұшуды екі сағаттан артық күтуге тура келсе, тасымалдаушы тегін сусын береді және екі рет қоңырау шалуға немесе хат жіберуге мүмкіндік жасайды. Төрт сағаттан артық күткенде ыстық тамақ, ал күндіз сегіз сағаттан, түнде алты сағаттан артық күткенде қонақүй берілуі тиіс. Әуе компаниясының үстінен eOtinish порталы арқылы Азаматтық авиация комитетіне шағым түсіруге болады.
SCAT — Шымкенттегі жеке әуе компаниясы, оның паркінде 40-қа жуық Boeing ұшағы бар. Компания ұшақтарының жоспардан тыс қонуы бұрын да болған — бұл туралы SCAT ұшақтарымен болған оқиғаларға арналған материалда жаздық.
