Ақтауда жылыту маусымы басталғалы бері №20 және №23 мектептерде жылу жоқ. Ата-аналардың айтуынша, балалар сабақта күртешемен отыр, кейбірі ауырып та қалған. Қалалық білім бөлімі екі мектепке жылу беруді 9 қарашаға жоспарлағанын хабарлады.
Мәселе туралы Lada.kz басылымына Мұхтар Әуезов атындағы №20 мектеп оқушыларының ата-аналары айтты. Олардың сөзінше, қала жылуға қосыла бастағаннан бері ғимараттағы батареялар суық күйі тұр. Ата-аналар «Каспий жылу, су арнасы» МКК-ға жүгінген, бірақ кәсіпорын өз тарапынан ақау жоқ деп жауап берген. Тағы бір шағым бар: мектеп аумағында бір учаске қазылған, алайда онда ешқандай жұмыс жүргізілмей жатыр. Кейін №23 мектептің де жылусыз отырғаны белгілі болды.
Білім бөлімі екі мектептің де оқу жылының басында жылыту маусымына дайындық паспортын алғанын, ішкі жылыту жүйелерінен ақау табылмағанын түсіндірді. Бөлім себебін сыртқы жылу желілерінен көріп отыр: жылу тасымалдағыш ғимараттарға қажетті көлемде жетпейді. Ведомство жауапты ұйымдармен бірге мәселені шешіп жатыр, ал кабинеттердегі температураны мектеп әкімшілігі бақылайды.
Сол күні Ақтау қаласының әкімдігі қалада жылумен жабдықтау қалыпты режимде жүріп жатқанын, ақаулар тек кейбір шағынаудандардағы жекелеген үйлерде ғана кездесетінін мәлімдеді. Ондағы басты себеп — басқарушы ұйымдардың жоқтығы. Жылуды МАЭК өндіреді, үйлерге дейін «Каспий жылу, су арнасы» жеткізеді, ал үй ішіндегі жүйені реттеу басқарушы компанияның міндеті. «Әр үйдегі жылумен жабдықтау жүйесінің жай-күйіне тікелей басқарушы ұйым жауап береді», — деді қала әкімі. Тұрғындарға өз басқарушы компаниясының, ПИК немесе МИБ жұмысын қайта қарауға кеңес берілді. Үйде суық болса, әкімдікке, оның ішінде Ақтау қаласының тұрғын үй инспекциясына жүгінуге болады.
Бұдан үш күн бұрын, 6 қарашада, 35-шағынаудандағы №18, 22 және 23 үйлердің тұрғындары суыққа шағымданған еді: маусым басталғалы бері оларға жылу келмеген. Сол кезде оқиға орнына қала әкімі мен «Каспий жылу, су арнасы» директоры барды. Себебі ретінде үйлердегі жылу тораптарының реттелуі бұзылғаны аталды. Тұрғындардың қарызына байланысты бұл үйлерде қызмет көрсететін ұйым жоқ, сондықтан баптау жұмысын коммуналдық кәсіпорын өз мойнына алуға мәжбүр болды.
