Sony-ге қарасты Santa Monica Studio PlayStation 5-ке арналған God of War Laufey ойынының шығу күнін 16 ақпаннан 2027 жылғы 20 мамырға ауыстырды. Бұл туралы әзірлеушілер 4 қарашада хабарлады. God of War Laufey – PlayStation-ның келесі жылға жоспарлаған басты эксклюзив ойыны әрі Sony-дің ең танымал сериясының жаңа бөлімі. Енді ойыншылар оны жазда уәде етілгеннен үш ай кешірек алады.
Студия бұл шешімді ойынды барынша жетілдіру қажеттілігімен түсіндірді. «God of War Laufey маусымда таныстырылғаннан бері Фэйдің саяхатын қаншама адам күтіп жүргенін көріп, шексіз алғыс айтамыз. Сондықтан God of War Laufey ойынының шығуын 2027 жылғы 20 мамырға ауыстыру туралы шешім қабылдадық. Оған дейінгі әр сәтті ойынды соңғы рет өңдеуге және оның бар әлеуетін ашуға жұмсаймыз», – делінген студия мәлімдемесінде.
Ойынға алдын ала тапсырыс 29 қыркүйекте ашылған. Sony бірнеше нұсқасын сатады:
- стандартты нұсқа – 69,99 доллар, Ұлттық банк бағамы бойынша шамамен 31,7 мың теңге; дискідегі нұсқасы да бар;
- Digital Deluxe цифрлық нұсқасы – 79,99 доллар (шамамен 36,2 мың теңге): оған қосымша сауыт пен қару жиынтығы, ойын ресурстары, цифрлық шағын артбук және саундтрек кіреді;
- Collector Box коллекциялық жинағы – 149,99 доллар (шамамен 67,9 мың теңге): ішінде жарық шығаратын Фэй мүсіншесі, 51 карталық колода және артбук бар, ал ойынның өзі кірмейді.
Кез келген нұсқаға алдын ала тапсырыс бергендер бонус ретінде сауыт жиынтығы мен косметикалық заттар алады, деп нақтылады Sony.
Қазақстандық ойыншылар үшін ойын сатып алу мәселесі әлі шешілмеген: елімізде PlayStation Store-дың ресми аймақтық дүкені әлі жоқ. Қыркүйекте Ұлттық банк төрағасының орынбасары Бинур Жаленов реттеуші бөлек қазақстандық аймақ ашу мәселесін 2027 жылдың бірінші тоқсанының соңына дейін шешуге үміттенетінін айтқан. Sony мұндай жоспар туралы әлі ресми жариялаған жоқ.
God of War Laufey ойыны 2026 жылғы маусымда State of Play таныстырылымында жарияланды. Бұл – басты кейіпкері Кратос емес сериядағы алғашқы негізгі бөлім. Ойыншы Кратостың әйелі әрі Атрейдің анасы Фэйді, яғни Әділ Лауфейді басқарады. Ол 2018 жылғы God of War оқиғаларынан бұрын қайтыс болған. Сюжет бойынша кейіпкер жақындарын қорғау үшін құдайлардың о дүниесінен өтеді. Жазда Сан-Диегодағы Comic-Con фестивалінде студияның шығармашылық жетекшісі Кори Барлог сериядағы келесі ойында Кратостың оралатынын және оның оқиғасы Лауфеймен тікелей байланысты болатынын растады.
God of War сериясы 2005 жылдан бері шығып келеді. Алдыңғы бөлімі God of War Ragnarök 2022 жылғы қарашада шығып, алғашқы аптада 5,1 млн дана сатылды. Ол кезде бұл Sony-дің өз ойындары арасындағы ең жылдам сатылым көрсеткіші болған.
