Украинаның ең ірі жеке энергетика компаниясы ДТЭК 4 қарашада кешке Ресейдің ел энергожүйесіне жасаған лаңкестік шабуылынан кейін өзінің үш жылу электр станциясының қандай күйге түскенін көрсетті. Ресей оларға 3 қарашаға қараған түні және таңертең ондаған зымыран мен дрон жіберген. Компанияның мәліметінше, қирау ауқымы зор, үш станцияның үшеуі де электр қуатын өндіруді тоқтатты, жөндеу ұзаққа созылады. Соққының салдарынан Киев пен бірнеше облыс екінші тәулік жарықтың шұғыл өшірілуімен отыр.
ДТЭК-тің хабарлауынша, станциялардың жабдығы қатты зақымданған, қызметкерлер зардап шеккен жоқ. Энергетиктер шығынды бағалап жатыр, оны «өте ауқымды» деп атады. Қалпына келтіру жұмыстары қауіпсіздік жағдайы мүмкіндік бергенде басталады. Компания бұл станцияларды бұған дейін де Ресейдің шабуылдарынан кейін бірнеше рет қалпына келтіргенін еске салды. Қай ЖЭС-тер зақымданғанын ДТЭК нақтыламады. Украина үкіметі соққы елдің шығысындағы Днепропетровск облысындағы, орталығындағы Винница облысындағы және солтүстік-шығысындағы Харьков облысындағы ірі электр станцияларына, сондай-ақ бірқатар қосалқы станцияға, оның ішінде Украинаның батысындағыларға тигенін хабарлады. Соққылар тоғыз облыста тіркелді, 14 өңірде нысандар зақымданды.
Шабуылдың ауқымын Украина Әуе күштері 3 қарашада таңертең жариялады. Олардың дерегінше, Ресей 289 шабуылдаушы дрон ұшырды, оның 120-сы — реактивті. Сонымен қатар Х-101, Х-59, Х-69 және «Искандер-К» қанатты зымырандарының 59-ы, «Искандер-М», солтүстіккореялық KN-23 баллистикалық зымырандары мен «Циркон» гипердыбыстық зымырандары атылды. Баллистикалық зымырандардың жалпы саны 17-ге жетті. Қорғаныс күштері 309 нысананы атып түсірді немесе басып тастады, оның ішінде 49 қанатты зымыран мен 257 дрон бар. 23 жерге соққы тиді, тағы 14 жерге атып түсірілген нысаналардың сынықтары құлады. «Шахед» — Ресей өз аумағында шығаратын ирандық шабуылдаушы дрон. Оның реактивті нұсқасы жылдамырақ ұшады, сондықтан оны атып түсіру қиынырақ.
Украина президенті Владимир Зеленский соққының басты нысанасы энергетика болғанын айтты. Оның сөзінше, Одесса, Черкассы, Житомир, Винница, Харьков, Днепропетровск, Черновцы, Чернигов және Ровно облыстарындағы генерация мен қосалқы станциялар атқыланған.
Бейбіт тұрғындар да зардап шекті. Украинаның екінші ірі қаласы Харьковта Немышлянский ауданындағы медициналық мекемеге соққы тиді. Прокуратураның мәліметінше, 73 адам зардап шеккен. Зеленскийдің айтуынша, қалалық клиникалық ауруханасының кардиология бөлімшесі зақымданған. Алдын ала дерек бойынша, 200-ге жуық науқас көшірілді. Медициналық зертхана, он шақты көпқабатты үйдің терезелері және 13 көлік зақымданды. Елдің шығысындағы Днепрде зымыран жылу электр орталығына тиді, маңайындағы хоспис, полиция бөлімшесі мен тұрғын үйлер зақымданды. Бес адам жараланды, олардың ішінде 80 және 81 жастағы екі ер адамның жағдайы ауыр. Украинаның оңтүстік-шығысындағы Запорожьеде 71 жастағы әйел жараланды, сол жерде жолаушылар вагондары, тепловоздар мен вокзал зақымданды. Елдің солтүстік-батысындағы Ковельде электровозға соққы тиді.
Украиналықтар соққының салдарын әлі де сезініп отыр. 3 қарашада таңертең ұлттық энергожүйе операторы «Укрэнерго» нұсқауымен Киевте, Киев және Днепропетровск облыстарында жарық шұғыл түрде өшірілді. Украина астанасында су уақытша тоқтап, қоғамдық көлік үзіліспен жүрді. Киев мэрі Виталий Кличко жау Киев энергетикалық торабының нысандарына шабуыл жасағанын хабарлады. Винница облысындағы елді мекендердің басым бөлігі жарықсыз қалды. 4 қарашада Киевте, Киев, Черкассы, Чернигов және Житомир облыстарында жарық кестесіз шұғыл өшіріле берді, ал Винница, Одесса, Днепропетровск, Полтава, Харьков, Николаев және Запорожье облыстарында сағаттық кесте қолданылды. ДТЭК-тің мәліметінше, Киевте жарықтың шұғыл өшірілуі бір тәуліктен асты.
Энергожүйеге шабуыл толастар емес: «Украинская правда» Әуе күштеріне сілтеме жасап хабарлағандай, 4 қарашаға қараған түні Ресей Украинаға тағы 300-ден астам дрон жіберген. Қыс алдында миллиондаған бейбіт тұрғынды жарықсыз, сусыз және жылусыз қалдыратын электр станцияларына соққы беру — әскери қылмыс әрі бейбіт халыққа қарсы жасалған саналы террор. Украина энергетикаға соққыларды тоқтатуды 10–11 қарашада Әбу-Дабиде АҚШ пен Ресейдің қатысуымен өтетін келіссөздердің бір тақырыбы деп атайды.
