Шымкенттік ауыр атлет Нұрғиса Әділетұлы Қытайдың Нинбо қаласында өтіп жатқан ауыр атлетикадан әлем чемпионатының күміс жүлдегері атанды. Бұл туралы 5 қарашада Шымкент қаласының әкімдігі хабарлады.
Әділетұлы жұлқа көтеруде 182 келі, серпе көтеруде 217 келі салмақты бағындырды. Қос сайыс қорытындысы бойынша оның нәтижесі – 399 келі. Чемпион атағын 415 келі (185 + 230) көтерген болгариялық Карлос Насар иеленді. Қола медаль 396 келі (181 + 215) нәтиже көрсеткен ирандық Али Алипурға бұйырды. Ол қазақстандық спортшыдан 3 келіге қалып қойды.
Әділетұлы әлем біріншілігінде бұған дейін де жүлде алған: 2024 жылы ол әлем чемпионы атанды, сондай-ақ Азия чемпионы атағы бар.
Нинбодағы әлем чемпионаты кесте бойынша 8 қарашаға дейін жалғасады.
