Украинаның оңтүстік-шығысындағы Запорожье облысына қарасты Комышуваха кентіне Ресей әуе күштері жасаған шабуылдан қаза тапқандар саны 40 адамға жетті. Бұл туралы 4 қарашада Украина президенті Владимир Зеленский мен Украина Төтенше жағдайлар мемлекеттік қызметі хабарлады. 2 қарашада таңертең Ресей әскері кентке бірнеше әуе бомбасын тастады. Алғашқысы тұрғындарға гуманитарлық көмек таратылып жатқан мектепке, келесілері адамдар тығылған баспанаға, кейінгілері оқиға орнына келген құтқарушылар мен полицейлерге тиді. Үйінді астында тағы 30-дан астам адам қалуы мүмкін, іздестіру жұмысы үшінші тәулік жүріп жатыр.
Бұл – соңғы кезде Ресейдің Украинадағы бейбіт тұрғындарға жасаған ең қанды лаңкестік шабуылдарының бірі. Адамдар азық-түлік алуға келіп, бомба астында қалды, ал оларды құтқаруға келгендерге қайта соққы берілді.
Киев уақытымен шамамен 15:30-да (Астана уақытымен 18:30) Зеленский Ресей әскері Комышувахаға тоғыз әуе бомбасын тастағанын жазды. Оның айтуынша, басқыншылар алдымен гуманитарлық көмек алуға келген адамдарды, содан кейін оқиға орнына жеткен құтқарушылар мен полицейлерді нысанаға алған. Президент 40 адамның қаза тапқаны белгілі болғанын, кейбір мәйіттердің әлі анықталмағанын, үйінді астында тағы 30-дан астам адам болуы мүмкін екенін хабарлады.
Президент әлемнің үнсіздігіне өкпесін білдірді. «Өкінішке қарай, бұл есуас шабуылға әлемнің реакциясы өте аз. Жауапсыз қалған зұлымдық әрдайым ары қарай жүреді. Реакция болады деп күтеміз: Украинаға әуе қорғанысы бойынша көмек дәл қазір қажет», – деді ол.
Киев уақытымен шамамен 17:50-де (Астана уақытымен 20:50) Украина ТЖҚ-сы да қаза тапқандар саны 40 екенін растады. Оқиға орнында құтқарушылар, тау-кен құтқару жасағы және кинологтар иттерімен жұмыс істеп жатыр. Қызметтің мәліметінше, иттердің көмегімен мәйіттердің 30-дан астам бөлігі табылған. Шаң, түтін, ауқымды қирау және қайта соққы қаупі жұмысты қиындатып отыр.
Төменде – Украина ТЖҚ-сының Комышувахадағы құтқару жұмысынан түсірілген фотосуреттері бар жазбасы.
Құрбандар саны үш күн бойы өсе берді. 2 қарашада кешке ТЖҚ 18 адамның қаза тауып, бес адамның жараланғанын хабарлаған, кейін қаза тапқандар саны 26-ға жетті. 3 қарашада Киев уақытымен сағат 14:00-дегі дерек бойынша 31 адам көз жұмған. 4 қарашада таңертең Запорожье облысы Қорғаныс кеңесінің тең төрағасы Иван Федоров 59 адамның хабарсыз кеткенін айтты. Билік олардың бір бөлігі қаза тапқандар арасынан анықталған болуы мүмкін екенін нақтылады.
Қаза тапқандардың арасында алғашқы соққыдан кейін тұрғындарға көмектескен төрт полицей мен ТЖҚ-ның екі құтқарушысы бар. Қызметтің тағы екі қызметкері жараланды. Kyiv Independent қаза тапқан құтқарушылардың есімін атады: олар – Денис Коноваленко мен Алексей Сущевский, екеуі де 44 жаста еді.
Федоровтың айтуынша, кентке ФАБ-3000 бомбасы да тасталған. Бұл – үш тонналық әуе бомбасы, оны Ресей ұшағы Украинаның әуе қорғанысы аймағына кірмей, алыстан тастайды. Kyiv Independent дерегінше, оның ішінде бір тоннадан астам жарылғыш зат бар, зақымдау радиусы 250 метрге дейін жетеді. Бомбалар мектептің спорт залын, шаруашылық ғимаратын және өрт сөндіру көлігін қиратты, мектеп ғимаратының өзі де зақымданды.
«Қасірет ауқымы адам шошырлық», – деді Запорожье облыстық әскери әкімшілігінің басшысы Михаил Семикин. Запорожье облысында 3–5 қараша аралығында үш күндік аза жарияланды. Зеленский бұл соққыны «аса сұмдық» деп атады.
Гуманитарлық көмек алуға келген адамдарға соққы беру және құтқарушыларға қайта шабуыл жасау халықаралық гуманитарлық құқық бойынша әскери қылмыс саналады. Бұл құқық бейбіт тұрғындарды және оларға көмек көрсететіндерді әдейі нысанаға алуға тыйым салады. Ресей бірнеше жылдан бері «қос соққы» тәсілін қолданып келеді: алғашқы соққы тиген жерге дәрігерлер, құтқарушылар мен полиция жиналған кезде сол жерді қайта атқылайды.
Комышуваха майдан шебінен шамамен 20 шақырым жерде орналасқан, 2025 жылғы қарашадан бері майдан маңындағы кент саналады. Ресей әскері бұған дейін де кентті басқарылатын әуе бомбаларымен атқылаған. Соққы Украина, АҚШ және Ресей Әбу-Дабиде келіссөздердің жаңа кезеңіне дайындалып жатқан тұста жасалды. Киев серіктестерінен әуе қорғанысы жүйелеріне қосымша зымыран-ұстағыштарды шұғыл беруді сұрап отыр.
