Семейде Жамақаев көшесіндегі скверде тұрған 15 метрлік Ленин ескерткішін апаттық жағдайына байланысты бөлшектеу басталды. Ескерткіштің айналасы қоршалып, қола мүсіннің басы алынды. Әкімдіктің түсіндіруінше, ескерткіш құлап қалуы мүмкін, ал бұл адамдарға қауіпті.
Семей қаласының тұрғын үй-коммуналдық шаруашылығы бөлімінің хабарлауынша, тексеру тұрғындардан көптеген шағым түскеннен кейін басталған. Комиссия орнына барып, құрылымды қарап шықты және техникалық қорытынды берді. Онда құрылымның көтергіштік қабілеті күрт төмендегені, мүсін бөліктерінің құлау қаупі тікелей төніп тұрғаны айтылған. Мамандар тірек түйіндері мен тірек тақтасының зақымдалғанын, металдың қатты коррозияға ұшырағанын, өтпелі жарықтар мен саңылаулар барын анықтады. Бөлшектеу жұмыстары осы қорытынды негізінде қолға алынды.
Бөлшектеу аяқталған соң қола мүсіннің не болатыны және оның орнына не салынатыны туралы әкімдік әзірге ештеңе айтқан жоқ. Жұмыстардың мерзімі де айтылмай отыр.
Ескерткіш 1977 жылғы 5 қарашада Қазан төңкерісінің 60 жылдығына орай орнатылған. Ол КСРО-дағы ең ірі Ленин ескерткіштерінің бірі саналған. Мүсін алғашында Семейдің орталық алаңында тұрды, 1995 жылы басқа жерге көшірілді, ал Жамақаев көшесіндегі сквер оның үшінші орны болды. Скверде тұрған кеңес қайраткерлерінің басқа ескерткіштері мен бюстері бұған дейін, жасыл аймақты қайта жаңарту кезінде алынған. Қайта жаңарту 2023 жылы жоспарланғанда Абай облысының сол кездегі әкімі Нұрлан Уранхаев ескерткіштер алынбайды, тек орны ауыстырылып, ықшам орналастырылады деп уәде берген еді.
Көрші Қырғызстанда 2025 жылдың жазында Ошта 25 метрлік Ленин ескерткіші бөлшектелді. Ол Орталық Азиядағы ең биік Ленин ескерткіші еді.
