Ресей әскері 29 қазанда күндіз Украинаның орталық-шығыс бөлігіндегі ірі өнеркәсіп қаласы Днепрдің теміржол вокзалына реактивті дронмен соққы жасады. Дрон Днепр — Запорожье бағытындағы № 866 қала маңы электр пойызы тұрған перронға тиді. Днепропетровск облыстық әскери әкімшілігінің басшысы Александр Ганжаның соңғы мәліметінше, 14 адам қаза тауып, тағы 14 адам жараланды. Ауыр жараланғандардың арасында 11 жасар бала бар.
Украина Әуе күштерінің «Шығыс» әуе қолбасшылығының дерегінше, Киев уақытымен шамамен сағат 11:00-де (Астана уақытымен 14:00-де) Ресей Днепропетровск облысына төрт реактивті шабуылдаушы дрон жіберген. Оның үшеуін әуе қорғанысы жойды, төртіншісі вокзалға жетті. Реактивті дрон Ресей өз елінде шығаратын иранның «Шахед» шабуылдаушы дронынан әлдеқайда жылдам ұшады. Сондықтан әуе қорғанысы мен жердегі адамдардың әрекет етуге уақыты аз қалады.
Қасірет туралы алғашқы хабар Киев уақытымен шамамен сағат 11:30-да (Астана уақытымен 14:30-да) шықты. Ганжа алдымен «көлік инфрақұрылымы нысанына» шабуыл жасалғанын хабарлады, кейін 13 адамның қаза тапқанын, кемінде бес адамның жараланғанын айтты. Күні бойы сан артып отырды. Киев уақытымен сағат 13:45-те (Астана уақытымен 16:45-те) облыстық әкімшілік 14 адам қаза тауып, 14 адам жараланғанын мәлімдеді. 13 адам ауруханаға жеткізілді, оның алтауының жағдайы ауыр. Олардың арасында 11 жасар бала, 40 және 53 жастағы ер адамдар және 26 жастағы әйел бар. Зардап шеккендердің бәрі көптеген жарықшақтан жараланған. 40 жастағы ер адамның екі аяғын дәрігерлер кесіп тастауға мәжбүр болды. Билік қаза тапқандардың есімін әзірге атаған жоқ.
Украина президенті Владимир Зеленский вокзалға жасалған соққының салдарын көрсететін видео жариялады.
Зеленский соққыны «сұмдық» деп атады. Оның сөзінше, дрон қала маңы электр пойызы мен жолаушылар пойызы тұрған перронға тиген. Президент қаза тапқандардың отбасыларына көңіл айтты. Ол шабуылды Мәскеуге қысымның әлсіреуімен байланыстырды: Зеленскийдің айтуынша, Ресейге қарсы санкциялардың бір бөлігі жұмсартылғаннан кейін де ол бейбіт тұрғындарға соққы беруін тоқтатқан жоқ. Президент Еуроодақты, АҚШ-ты және «Үлкен жетілік» елдерін Ресейге қарсы жаңа, қатаң санкциялар енгізуге және соғыс жүріп жатқанда оларды әлсіретпеуге шақырды.
Днепр мэрі Борис Филатов әріптестерін «инфрақұрылым нысандарының зақымдануы» деген сөздерді жазуды доғаруға шақырды. «Дрон бейбіт электр пойызына тиді. Көп адам қаза тапты. Жаралылар өте көп. Бұл — геноцидтік соғыс. Нәрсені өз атымен атауға батылдық керек», — деп жазды ол Telegram арнасында.
«Укрзализныця» мемлекеттік теміржол компаниясының хабарлауынша, вокзалда қауіп күшейгені алдын ала жарияланған. Мониторинг реактивті дронды байқаған кезде локомотив бригадалары мен станция қызметкерлеріне қозғалысты тоқтату туралы бұйрық берілді. Запорожьеге баратын электр пойызында эвакуация жарияланды. Вагондарда дауыстық хабарлама берілді, машинист көмекшісі әр вагонды аралап шықты. Жолаушылардан пойыздан түсіп, перроннан кемінде 200 метр алыстауды сұрады. Компанияның дерегінше, соққыға дейін он минуттан астам уақыт қалған. Алайда дрон тиген сәтте көп адам әлі пойыздың жанында болған, сондықтан құрбан саны көп. «Укрзализныця» адамдар уақытында панаға жетуі үшін қауіпсіздік хаттамаларын қайта қарап жатқанын мәлімдеді.
Оқиға орнында Төтенше жағдайлар мемлекеттік қызметінің құтқарушылары, дәрігерлер мен полиция жұмыс істеді. Жолаушылар тұрған вокзалға жасалған соққы — Ресейдің бейбіт тұрғындарға қарсы кезекті лаңкестік шабуылы әрі әскери қылмыс: халықаралық гуманитарлық құқық бейбіт адамдарға және азаматтық көлікке соққы беруге тыйым салады.
Толық ауқымды соғыстың алғашқы айларынан бері Днепр Ресей зымырандары мен дрондарының басты нысанасының бірі болып келеді. Қала Украинаның оңтүстік-шығысына апаратын көлік торабы саналады: Запорожьеге және майдан маңындағы аудандарға пойыздар осы қала арқылы өтеді. 2023 жылғы қаңтарда Ресей зымыраны Днепрдегі көпқабатты үйдің бір подъезін қиратып, 46 адам қаза тапты. Ресей теміржолға да үнемі соққы береді. 2022 жылғы сәуірде зымыран эвакуация күтіп тұрған адамдар жиналған Краматорск вокзалына тиіп, 61 адам қаза тапты. 2022 жылғы тамызда Днепропетровск облысындағы Чаплино станциясына жасалған зымыран соққысы 25 адамның өмірін қиды. 2025 жылғы қазанда Ресей дрондары Украинаның солтүстігіндегі Шостка қаласында жолаушылар пойызына шабуыл жасады.
Днепрге жасалған шабуыл бейбітшілік туралы келіссөздер мен Олешки маңындағы атысты тоқтату келісіміне қарамастан, Ресей Украина қалалары мен энергетика нысандарына соққы беруін жалғастырып жатқан кезге тұспа-тұс келді. Бір күн бұрын Ресей дроны елдің солтүстік-батысындағы Ровно облысында кәсіпорынға соққы беріп, бір адамды өлтірді.
