Фармацевтикалық инспекциялар ынтымақтастығының халықаралық жүйесі PIC/S 2027 жылы Қазақстанға бағалау миссиясы мен инспекция жіберуді мақұлдады. Шешім 2–3 қарашада Ыстамбұлда өткен отырыста қабылданды. Отырысқа Дәрілік заттар мен медициналық бұйымдарды сараптау ұлттық орталығының инспекторлары қатысты, деп хабарлады Қазақстан Денсаулық сақтау министрлігі.
Бағалау сапары – мүшелікке өту рәсімінің келесі кезеңі. Оның қорытындысы Қазақстандағы фармацевтикалық инспекция жүйесінің халықаралық талаптарға сай келетін-келмейтінін көрсетеді.
PIC/S дәрінің өндірілуі мен таратылуын тиісті өндірістік (GMP) және дистрибьюторлық (GDP) практика стандарттары бойынша тексеретін реттеушілерді біріктіреді. Жүйеге мүше елдер бір-бірінің инспекция нәтижелеріне сенім білдіреді, бұл дәрі экспортын жеңілдетеді.
Қазақстан мүшелікке өтінімді 2025 жылғы наурызда берген. 2025 жылғы қарашада Гонконгта өткен PIC/S комитетінің отырысында өтінімнің толық екені расталып, баяндамашы мен қосалқы баяндамашы тағайындалды. Дайындық барысында инспекторлар GMP және GDP стандарттары бойынша оқытылды, Дүниежүзілік денсаулық сақтау ұйымымен бірлескен оқу аудиті өтті. Сондай-ақ ішкі рәсімдер мен нормативтік актілер, соның ішінде жоспардан тыс инспекцияларға қатысты талаптар жаңартылды.
Денсаулық сақтау министрлігінің дерегінше, 2025 жылы Қазақстанда дәрі өндірісі 37%-ға өсіп, 191 млрд теңгеге жетті, ал фармацевтикалық өнім экспорты 17,8%-ға артты. 2026 жылдың сегіз айында 157,4 млрд теңгенің өнімі шығарылды, бұл былтырғы осы кезеңнен 30%-ға жуық көп. Соңғы екі жылда салаға салынған инвестиция 3,3 есе, экспорт 1,9 есе өсті.
