Қазақстандық балуандар Нұрқожа Қайпанов пен Жамила Бақбергенова 2026 жылы Астанада өткен әлем чемпионатынан кейін жаңартылған United World Wrestling (UWW) әлемдік рейтингінің алғашқы үштігіне енді. Еркін күресте 74 келіге дейінгі салмақта Қайпанов үшінші орынға, әйелдер күресінде 72 келіге дейінгі салмақта Бақбергенова екінші орынға көтерілді.
Қайпанов бірден 25 саты көтеріліп, 48 400 ұпай жинады және словакиялық Таймураз Салказановты (45 480) басып озды. Қазақстандықтан жоғары тек ресейлік Иналбек Шериев (55 200) пен жапониялық Ёсиносукэ Аояги (53 400) тұр.
Рейтингтегі серпіліске үй алаңындағы әлем чемпионатының күміс медалі себеп болды. Астанада Қайпанов Косово балуанын (10:0), әзербайжандық Туран Байрамовты (4:0), тәжікстандық Виктор Рассадинді (11:0) және жартылай финалда Аоягиді (3:1) жеңді. Финалда ол Шериевке 4:10 есебімен есе жіберді.
Бақбергенова екі саты көтеріліп, 43 240 ұпай жинады. Рейтингті поляк балуаны Виктория Холуй (60 200) бастап тұр, үшінші орында – қытайлық Цзылу Ли (43 000).
Астанадағы әлем чемпионатында Бақбергенова бесінші орын алды. Ол молдовалық Эмилия Кречунды (13:2) және украиналық Надежда Соколовскаяны (9:1) жеңді, бірақ жартылай финалда Цзылу Лиге 2:4 есебімен жол берді, ал қола үшін белдесуде жапониялық Махиро Ёситакэге 4:6 есебімен жеңілді. Бұл медаль 30 жастағы балуан үшін әлем біріншіліктеріндегі бесінші жүлде болар еді: оның үш күміс пен бір қола медалі бар.
