Қазақстандық еркін күрес балуаны Нұрқожа Қайпанов Астанада өтіп жатқан әлем чемпионатының финалына шықты. 31 қазанда 74 келіге дейінгі салмақтағы жартылай финалда ол жапониялық Ёсиносукэ Аоягиді 3:1 есебімен жеңіп, кемінде күміс медальға қол жеткізді. Қайпанов үй алаңындағы чемпионатта финалға шыққан алғашқы қазақстандық балуан атанды.
Алтын медаль үшін белдесу 1 қарашада, жарыстың соңғы күні «Барыс Аренада» өтеді. Қайпановтың қарсыласын екінші жартылай финал анықтады: онда Словакия балуаны Таймураз Салказанов пен ресейлік Иналбек Шериев кездесті.
Жартылай финалда бір-бірін жақсы білетін екі бәсекелес түйісті. Олимпиадалық 74 келі салмаққа ауыспас бұрын екеуі де 70 келіге дейінгі салмақта күрескен. 2024 жылы Тиранада өткен әлем чемпионатының финалында қазақстандық балуан басым түсті, ал бір жылдан кейін Загребте әлем чемпионы атағын Аояги жеңіп алды. Биыл жапон балуаны 74 келі салмақта Азия чемпионы атанды.
Жартылай финалға дейін Қайпанов қарсыластарына бірде-бір ұпай бермеді. Ол Косоводан келген Эгзон Джониді 10:0, әзербайжандық Туран Байрамовты 4:0 есебімен жеңді, ал ширек финалда тәжікстандық Виктор Рассадинді 11:0 есебімен мерзімінен бұрын ұтты.
28 жастағы Қайпанов — 2024 жылғы әлем чемпионы, 2019 жылғы әлем чемпионатының күміс және 2025 жылғы әлем чемпионатының қола жүлдегері, үш дүркін Азия чемпионы. Ол финалға шыққанға дейін Қазақстан құрамасы үй алаңындағы чемпионатта тек қола медаль жеңіп алған еді: грек-рим күресінде Айдос Сұлтанғали мен Исхар Құрбаев үшінші орын алды, сондай-ақ Бағдат Сабаз бен Зейнеп Баянова қола медаль алды. Астанадағы әлем чемпионаты 24 қазаннан 1 қарашаға дейін өтеді.
