Ресей әскері 4 қарашада күндіз Украинаның Донецк облысының солтүстігіндегі Краматорск аумақтық қауымдастығына қарасты Ясногорка кентінің жеке үйлеріне екі ФАБ-250 басқарылатын авиабомбасын тастады. Соққыдан екі бейбіт тұрғын әйел қаза тапты, тағы бір әйел жараланды. Бұл туралы Краматорск қалалық әскери әкімшілігінің басшысы Александр Гончаренко хабарлады. Оның айтуынша, лаңкестік шабуыл Киев уақытымен шамамен 15:50-де (Астана уақытымен 18:50-де) болған.
Гончаренконың мәліметінше, 1978 және 1973 жылы туған әйелдер қаза тапты. Олар шамамен 48 және 53 жаста еді. 1979 жылы туған әйел жараланды. Билік әзірге құрбандардың есімін атаған жоқ. Жарылыстан алты тұрғын үй зақымданды. Қаза тапқандар мен жаралылар туралы Суспильне Донбасс пен басқа да украин БАҚ-тары қалалық әскери әкімшілікке сілтеме жасап хабарлады.
ФАБ-250 – салмағы шамамен 250 келі болатын кеңестік фугасты авиабомба. Ресей әскері мұндай бомбаларға қанат пен спутниктік навигация модулін орнатып, оларды басқарылатын бомбаға айналдырады. Ұшақ оларды Украинаның әуе қорғанысы аймағына кірмей-ақ, нысанадан ондаған шақырым жерден тастайды. Украинада мұндай бомбаларды КАБ деп атайды. Тұрғын үйлерге қарсы бұл – ең қиратқыш қарулардың бірі: бомба жеке үйді түгел қиратып, көршілес үйлерді де зақымдайды.
Ясногорка – Краматорскінің маңындағы кент. Краматорск – Донецк облысында Украинаның бақылауында қалған ең ірі қала. Ресей Краматорск пен көршілес Славянск қаласын үнемі атқылап тұрады. Сол күні Киев уақытымен шамамен 11:00-де ресейлік ФАБ-250 авиабомбасы Славянскідегі жұмыс істемей тұрған медициналық мекемеге түсті.
Сол күні тағы бір соққы еріктілерге тиді. Краматорскіде ресейлік шабуыл майдан шебіне жақын қалалардан адамдарды көшіретін «Өмір жолы» жобасының көлігін зақымдады. Жобаның негізін қалаушылардың бірі Ваге Мамиконянның айтуынша, ешкім зардап шеккен жоқ, көлікте жолаушы болмаған, бірақ машинаны жөндеу керек.
Ресейдің соққылары салдарынан қала гуманитарлық апат жағдайында өмір сүріп жатыр. Донецк облыстық әскери әкімшілігінің басшысы Вадим Филашкин 2 қарашада атқылаудан Краматорскінің шамамен 90 пайызы сусыз қалғанын хабарлады. «Краматорсктеплоэнерго» коммуналдық кәсіпорны су болмағандықтан 1 қарашадан бастап үйлерге жылу бере алмайтынын мәлімдеді. Қаланың бір бөлігінде маусымнан бері балалы отбасыларды мәжбүрлі түрде көшіру жүріп жатыр. Тамызда оның аумағы кеңейтілді, ал 11 қазанда мерзімі ұзартылды. 1 қарашадан бастап Донецк облысында ұзартылған коменданттық сағат енгізілді: ол сағат 16:00-ден келесі күні сағат 11:00-ге дейін созылады.
Тұрғын үйлерді басқарылатын авиабомбамен атқылау – Ресейдің майдан шебіне жақын қалаларға қарсы лаңкестігінің басты тәсілдерінің бірі. Жақында Ресей осындай бомбалармен Запорожье облысындағы гуманитарлық көмек таратылған мектепті бомбалады, онда 40 адам қаза тапты. Халықаралық құқық бойынша әскери нысан жоқ бейбіт үйлерге соққы беру – әскери қылмыс.
