Астанада 3–6 қараша аралығында UEFA A бапкерлік лицензиясын алуға арналған оқудың үшінші модулі өтіп жатыр. Оны Қазақстан Футбол Федерациясы (ҚФФ) ұйымдастырды. Модульдің басты тақырыбы – шабуыл ойыны: алаңның екінші және үшінші аймақтарындағы әрекеттер, допты алға жылжыту, шабуылды аяқтау және шабуылдан қорғанысқа көшу.
Тыңдаушылар шабуылдағы командалық және топтық өзара әрекетті талдайды. Доп жоғалтқаннан кейін ойыншылар бірден не істеуі керек екені де жеке қарастырылады. Тағы бір блок апталық микроциклді жоспарлауға арналған: бапкерлер жүктемені дұрыс бөлуді және жаттығу мазмұнын алдағы матчпен байланыстыруды үйренеді.
Сабақтың едәуір бөлігі алаңда өтеді. Бапкерлер ойын эпизодтарын талдап, жаттығуларды өздері құрастырады және оларды өздері жүргізеді. Содан кейін таңдалған жаттығулардың қаншалықты нәтиже бергенін, қандай шешімдер тиімдірек болатынын бірге талқылайды.
UEFA A – UEFA жүйесінде Pro лицензиясынан кейінгі екінші деңгейдегі бапкерлік лицензия. Осы курстың бірінші модулі шілденің ортасында Астанада өткен еді. Қыркүйекте федерация Талғарда элиталық жасөспірімдер футболы бапкерлеріне арналған UEFA «A-Элит» курсының модулін де өткізді.
