Бүкілқытайлық халық өкілдері жиналысының (БХӨЖ) Тұрақты комитеті 6 қарашада трансшекаралық сыбайлас жемқорлыққа қарсы іс-қимыл туралы заң қабылдады. 6 тарау мен 47 баптан тұратын құжат жарияланған күні күшіне енді, деп хабарлады «Синьхуа» агенттігі. Заңды 14-шақырылымдағы БХӨЖ Тұрақты комитетінің 25-сессиясы мақұлдады.
Заң органдардың тетіктері мен өкілеттігін, істерді тергеу және халықаралық ынтымақтастық тәртібін, адалдық пен комплаенске қойылатын талаптарды, сондай-ақ заңдық жауапкершілікті белгілейді. Оның мақсаты — трансшекаралық сыбайлас жемқорлықтың алдын алу және жазалау, осы саладағы халықаралық ынтымақтастықты кеңейту, Қытайдың егемендігін, қауіпсіздігін және даму мүдделерін қорғау, сондай-ақ сыбайлас жемқорлыққа қарсы «әділ әрі ақылға қонымды» жаһандық жүйе құруға жәрдемдесу.
Шетелде жұмыс істейтін қытай компаниялары өз көлеміне, қызмет саласына және тәуекеліне қарай комплаенс бөлімшесін құруы немесе жауапты қызметкер тағайындауы керек. Тексеру мен тергеу жүргізетін органдар қолына түскен мемлекеттік және коммерциялық құпияны, дербес деректерді сақтауға міндетті.
Заң жобасы алғаш рет 2025 жылғы тамызда қаралған. Екінші оқылымда оған сыбайлас жемқорлыққа қарсы әділ жаһандық басқару жүйесін ілгерілету туралы ереже қосылды. Дауыс беру қарсаңында ҚКП ОК Саяси бюросы Тұрақты комитетінің мүшесі, Тәртіпті тексеру жөніндегі орталық комиссияның басшысы Ли Си «Жэньминь жибао» газетінде трансшекаралық сыбайлас жемқорлықпен күресу үшін жеке заң қажет екенін жазды.
Сыбайлас жемқорлықпен күрес — Си Цзиньпин басшылығының басты тақырыптарының бірі. «Аспан торы» операциясы аясында Қытай 2015 жылдан 2024 жылдың соңына дейін 120-дан астам елден 14 048 қашқынды және 66,62 млрд юань (шамамен 9,9 млрд доллар) заңсыз активті қайтарды. 2025 жылы елге тағы 963 адам қайтарылып, трансшекаралық сыбайлас жемқорлық бойынша 505 іс қозғалды.
