Владивостоктың «Адмирал» клубы мен Қазақстан құрамасының қақпашысы Никита Бояркин 4 қарашада КХЛ тұрақты чемпионатында Санкт-Петербургтің СКА командасына қарсы матчта шайба соқты және өз қақпасына бірде-бір шайба өткізбеді. «Адмирал» 4:0 есебімен жеңді, қазақстандық голкипер қақпаға жасалған 39 соққының бәрін қайтарды.
Гол үшінші кезеңде, есеп 3:0 болып тұрғанда Бояркиннің атына жазылды. Көпшілік құрамда ойнаған СКА қақпашысын алтыншы алаң ойыншысымен алмастырған еді. Дәл емес пастан кейін шайба бортқа тиіп, петербургтіктердің бос қақпасына кірді. «Адмирал» ойыншыларының ішінде шайбаға соңғы болып Бояркин тиген, сондықтан гол соның есебіне жазылды.
Оған дейін тоғызыншы минутта көпшілік құрамды пайдаланған Егор Чезганов есеп ашты. Екінші кезеңнің басында Иван Янченко шайбаны қақпа алдынан қағып кіргізді, ал 37-минутта Даниэль Усманов тағы да көпшілік құрамда гол соқты. Қақпаға соққы саны бойынша СКА басым түсті – 39-ға қарсы 27.
Бояркин 17 жыл бұрынғы жетістікті қайталады. КХЛ-да бір матчта гол соғып, қақпасын таза сақтаған алғашқы қақпашы – Магнитогорск «Металлургінің» голкипері Илья Проскуряков. 2009 жылғы 25 қаңтарда оның командасы Қазанның «Ак Барсын» 2:0 есебімен ұтқан.
СКА үшін бұл жеңіліс жаңа бас бапкер Андрей Разиннің тұсындағы сәтсіз сериясын жалғастырды: оның басшылығымен команда алты матчтың төртеуінде жеңілді. 21 ойыннан кейін 21 ұпай жинаған петербургтіктер Батыс конференциясында тоғызыншы орында тұр.
28 жастағы Бояркин осы маусымға дейін Астананың «Барыс» клубының қақпасын қорғады, бұл командада ол 2021 жылдан бері ойнаған.
