АҚШ Қорғаныс министрлігі елдің континенттік бөлігіндегі ірі әскери базаларды ауқымды қақтығыс бола қалған жағдайда сырттан көмексіз кемінде 90 күн жұмыс істей алатындай етіп дайындап жатыр. Талаптар FORTRESS бастамасында бекітілген, оның құжаттарымен Fox News телеарнасы танысқан. Жоспарды Пентагонның бас өкілі Шон Парнелл растады.
Азаматтық инфрақұрылым істен шыққан жағдайда базалар электр энергиясымен, сумен, жанармаймен және байланыспен өзін-өзі қамтамасыз ете алуы керек. Ол үшін жылжымалы шағын ядролық реакторларды, ірі энергия жинақтау жүйелерін және қалалық желілерден бөлек жұмыс істейтін жергілікті микрожелілерді пайдалану ұсынылады. Кейбір нысандарда микрожелілер мен аккумуляторлар қазірдің өзінде енгізіліп жатыр.
Бастама оқ-дәрінің, жанармайдың, дәрі-дәрмектің, электрониканың, қосалқы бөлшектердің және аса маңызды минералдардың стратегиялық қорын жасауды көздейді. Сондай-ақ негізгі қорғаныс қажеттіліктері үшін кемінде екі тәуелсіз жеткізу тізбегін құру, дағдарыс кезінде азаматтық кәсіпорындарды әскери өнім шығаруға көшіру мүмкіндігі қарастырылған. Әскери байланысты, навигация мен жерсеріктерді кибершабуылдардан және GPS сигналын басудан қорғау жеке жазылған.
Парнелл Anadolu агенттігіне берген түсініктемесінде қорғаныстың азаматтық инфрақұрылымға тәуелді болуын «қабылдауға болмайтын тәуекел» деп атады, ал FORTRESS бастамасын сақтандыру полисінің бір түрі деп сипаттады. Оның айтуынша, электр қуатының өшуі байланысты, сумен жабдықтауды, логистиканы және әскерді басқаруды бұзуы мүмкін, ал АҚШ-ты екі мұхит қорғап тұр деген бұрынғы түсінікті қайта қарау керек. Ол бастаманы Президент Дональд Трамптың Гренландияға, Панамаға және Батыс жарты шарға ерекше көңіл бөлуімен, сондай-ақ «Алтын күмбез» зымыранға қарсы қорғаныс бағдарламасымен байланыстырды.
FORTRESS атауы Federal Operations for Resilience, Troop Resources, Energy, Supply, and Survivability дегенді білдіреді — тұрақтылық, әскер ресурстары, энергетика, жабдықтау және төзімділік жөніндегі федералдық шаралар. Бастама америкалық армияның қорын сарқыған Иранмен соғыс кезінде пайда болды: қыркүйекте Пентагон оқ-дәрі тапшылығын мойындап, оны толықтыруға шамамен үш жыл керек екенін айтқан. Қазанда ведомство сондай-ақ Lockheed компаниясымен 850 F-35 жойғыш шығаруға келісті.
