Қазақстан Орталық Азия елдеріне экспорттайтын бидай мен ұнның жартысынан астамын теміржол арқылы жеткізді. Бұл туралы 2016 жылғы 29 қыркүйекте «Қазақстан темір жолы» ҰК» АҚ баспасөз қызметі хабарлады.
Жыл басынан бері теміржолмен 5 млн тоннадан астам астық тасымалданған, оның 3 млн тоннадан астамы экспортқа жөнелтілген. Сол кезеңде 2 млн тоннаға жуық ұн тасылып, оның 1,5 млн тоннаға жуығы шетелге шығарылған.
ҚТЖ контейнерлік тасымалдың да өскенін атап өтті. Қазақстан аумағы арқылы өтетін Қытай – Еуропа транзиттік бағытымен 1210 контейнерлік пойыз жүрген. Өткен жылдың осы кезеңінде олардың саны 503 болған, яғни пойыздар 2,5 есеге жуық көбейген. Кері бағытта, Еуропадан Қытайға қарай, Қазақстанның транзит аймағы арқылы 245 пойыз өткен. Бір жыл бұрын бұл көрсеткіш 101 еді.
Компания экспорттық бағыттардың географиясын кеңейтіп, контейнерлік пойыздармен тасылатын жүк көлемін арттырып жатқанын хабарлады.
Сонымен қатар Қазақстан келесі маркетингтік жылға арналған астық экспортының болжамын 7–7,5 млн тоннадан 8,5–9 млн тоннаға дейін көтерді. Ең көп астық Ауғанстанға – 4,2 млн тонна жөнелтілмек. Иранға 1,8 млн тонна, Ресейге 900 мың тонна, Қытай мен Әзербайжанға 500 мың тоннадан, Грузияға 200 мың тонна астық жеткізу жоспарланып отыр.
«Радиоточка», Sputnik Қазақстан материалдары бойынша.
