Мәжіліс депутаты Мұхтар Тінікеев Алматыда кезекті жол-көлік оқиғасынан кейін 20 тәулікке қамалған Мақсат Үсеновтің ата-анасына ұлын өздері жазалауға, тіпті белбеумен сабауға кеңес берді. Бұл туралы «Новости-Казахстан» ақпарат агенттігі хабарлады.
Тінікеев журналистерге азаматтардың ашуын түсінетінін айтты. Алайда оның сөзінше, бұл жағдайда заң да, депутаттар да ештеңе істей алмайды. Ол Үсеновтің әкесіне ұлының көлік кілтін алып, белбеумен сабауды ұсынды. «Оны жай ғана рөлге отырғызбау керек», — деді депутат. Ол бұл жағдайды басқа жүргізушілер үшін қасірет, жолда жүретіндердің бәрінің ортақ проблемасы деп атады.
15 қараша, сенбі күні Үсенов «Мерседес» көлігімен жол апатына түсіп, 38 жастағы әйел зардап шекті. Қазір ол 20 тәулікке қамауда отыр. Заңгерлердің айтуынша, оны қылмыстық жауапкершілікке тарту мүмкін емес.
2013 жылғы желтоқсанның басында бұған дейін мас күйінде көлік жүргізгені үшін жүргізуші куәлігінен айырылған Үсенов BMW X6 көлігімен Алматыда тротуарда тұрған жастарды қағып кеткен. Олардың бірі оқиға орнында көз жұмды. 2014 жылғы қаңтардың соңында қаза тапқан жігіттің әкесі жүргізушіні кешіргенін айтып, татуласуға байланысты істі тоқтатуды сұрады. Іс жабылып, Үсенов жарты миллион теңгеге жуық айыппұл төлеп, бостандыққа шықты.
Прокуратура бұл шешімге наразылық білдірді. Осыдан кейін Үсенов 45 тәулікке әкімшілік қамауға алынып, екі жылға көлік жүргізу құқығынан айырылды.
«Радиоточка» материалдары бойынша.
