Қазақстандық жастар дәріханалардан трамадол сатып алып жүр. Бұл — рецептпен қатаң түрде ғана берілуге тиіс күшті ауырсынуды басатын дәрі. Бірнеше таблеткасы героин дозасына ұқсас әсер беріп, қатты тәуелділік тудырады, алайда дәріханашылар оны еркін сатады. Бұл туралы КТК телеарнасы хабарлады.
Дәрігерлер трамадолды негізінен онкологиялық науқастардың ауырсынуын басу үшін тағайындайды. Ал жасөспірімдер оны көңіл көтеріп, күш-қуат алу үшін ішеді. Олардың бірі журналистерге бес таблетка ішкен соң шындықпен байланысын жоғалтқанын айтты.
Фармацевтер бұл дәрінің тәуелді адамдарға қауіпті екенін біледі, бірақ журналистердің тәжірибесі заңсыз сауданың жүріп жатқанын көрсетті. Сатып алушылар мен провизорлар «өз адамын» танитын құпия сөздер ойлап тапқан. Бір дәріханада мұндай құпия сөз — өндіруші компанияның атауы «Ланнахер». Нашақорларға трамадол нарықтық бағадан қымбат сатылады. Оны көп мөлшерде алады: алғашында бес таблетка жетсе, уақыт өте келе елу таблетка керек болады.
Нарколог дәрігер Ольга Лалетинаның айтуынша, мұндай тәуелділік адамның мінезін өзгертеді: ол өзімшіл әрі өтірікші бола бастайды. «Бұл дәріні тоқтатқанда героин нашақорлығындағыдай сыну, абстиненция басталады», — деді ол.
Қоғам белсенділерінің сөзінше, елде дәріханалық нашақорлық өсіп келеді. Бір аптада ата-аналар Алматыдағы оңалту орталықтарының біріне бес жасөспірімді әкелген. Дәрігерлер жағдай өзгермесе, бірнеше жылдан кейін жазылмайтын науқастар көбейетінін ескертеді.
«Свободные люди» қорының директоры Ольга Агапова бақылаушы органдар өз жұмысын атқарса, жағдайды түзетуге болатынын айтады. «Бұл жағдайда олар болып жатқан нәрсеге жай ғана көз жұмып отыр», — деді ол. Оның дерегінше, Алматыдағы көптеген дәріханада трамадол рецептсіз сатылады, кейбірінде құпия сөзді білу қажет, ал Талдықорғанда мұндай дәріханалар кез келген жерде бар.
Украина мен Беларусьта трамадол есірткі құралдарының тізіміне енгізілген, сондықтан оны заңсыз сатқаны үшін қылмыстық жауапкершілік қарастырылған. Қазақстанда рецептсіз сатқан дәріханашыға тек айыппұл салынады.
«Радиоточка» материалдары бойынша.
