Германияның Audi автоөндірушісі 30 қазанда пайдасының күрт азайғанын хабарлады. 2026 жылғы шілде–қыркүйекте топтың таза пайдасы 87%-ға қысқарып, 95 млн еуро болды. Былтыр осы кезеңде бұл көрсеткіш 718 млн еуро еді. Нәтижеге Қытайдағы сұраныстың әлсіреуі, қытайлық электромобиль өндірушілерімен бәсеке және АҚШ-тың импорт баждары әсер етті.
Тоғыз айда Audi-дің түсімі былтырғы 48,38 млрд еуродан 42,06 млрд еуроға дейін төмендеді. Операциялық пайда 1,56 млрд еуродан 1,15 млрд еуроға түсіп, операциялық рентабельділік 2,7%-ға дейін азайды. Осы кезеңдегі таза пайда 1,22 млрд еуро болды.
Сатылым ең ірі екі шетелдік нарықта қатты құлдырады. Гонконгты қоса алғанда Қытайда тоғыз айда сатып алушыларға 328 мың Audi көлігі жеткізілді. Бұл былтырғыдан 24,5% аз. Солтүстік Америкада жеткізілім 17,3%-ға қысқарып, 128,7 мың көлікке түсті. Ал Германия мен Еуропаның басқа елдерінде сатылым сәл өсті. Жалпы топ клиенттерге 1,06 млн көлік жеткізді, бұл өткен жылмен салыстырғанда 11,3% аз.
Audi 2026 жылға арналған болжамын биыл екінші рет төмендетті. Компания енді 58–63 млрд еуро емес, 55–59 млрд еуро түсім күтеді, ал рентабельділік 5–7% орнына 3–5% болмақ. Қаржы директоры Юрген Риттерсбергер Audi-ге кідірмей әрекет ету керек екенін айтып, шығынды қысқарту бағдарламасын күшейтуге уәде берді.
Audi АҚШ-та жеңіл көлік шығармайды, сондықтан американ нарығына арналған барлық көлігіне импорт баждары салынады. Қазан айында компания Джорджия штатында АҚШ-тағы алғашқы зауытын салатынын мәлімдеді, бірақ ол толық қуатына тек 2030 жылдардың басында шығады. Германияда Audi 2029 жылға дейін 7 500-ге дейін жұмыс орнын қысқарту туралы келісіп қойған. Бас концерн Volkswagen те үшінші тоқсанды шығынмен аяқтады.
