2015 жылдың жазында Алматы олимпиадалық қала атануға таяп қалды. 2022 жылғы қысқы Олимпиада ойындарының астанасы туралы шешім Халықаралық олимпиада комитетінің Куала-Лумпурдағы 128-сессиясында қабылданатын болды, ал қазақстандық қаланың жалғыз бәсекелесі Пекин еді.
Zakon.kz хабарлағандай, маусым айында «Алматы-2022» ұйымдастыру комитетін басқарған премьер-министр Кәрім Мәсімов бастаған қазақстандық делегация Лозаннадағы техникалық брифингте өтінімді бірінші болып таныстырды. Делегация құрамында Алматы әкімі Ахметжан Есімов, ҰОК басшысы Темірхан Досмұхамбетов, мәдениет және спорт министрі Арыстанбек Мұхамедиұлы және 2014 жылғы Олимпиаданың қола жүлдегері Денис Тен болды. Досмұхамбетов қаланың Ойындарға дайындығын 70 пайызға бағалап, Алматы мен Пекиннің мүмкіндігін тең — «50-ге 50» деп атады. Дәлел ретінде ол Алматы 2017 жылдың басында қабылдайтын қысқы Универсиаданы да келтірді.
Дауыс беру 31 шілдеде өтті. Newtimes.kz «Р-Спорт» агенттігіне сілтеме жасап жазғандай, ХОК-тың 85 мүшесінің 44-і Пекинді, 40-ы Алматыны қолдады, біреуі қалыс қалды. Пекин жазғы да, қысқы да Олимпиаданы өткізу сеніп тапсырылған алғашқы қала болды.
Zakon.kz, Newtimes.kz материалдары бойынша.
