Алматы полициясы 36 жастағы ер адамды Марғұлан көшесінде қағып өлтірген жүргізушіні іздеп жатыр. Бұл туралы қалалық ішкі істер департаментінің баспасөз қызметі хабарлады.
«Новости-Казахстан» ақпарат агенттігінің мәліметінше, жол-көлік оқиғасы түнгі сағат 00:30-да Марғұлан көшесінде (бұрынғы Маречек көшесі), Момышұлы көшесінен батысқа қарай болған.
ІІД Жергілікті полиция қызметінің іздестіру бөлімінің дерегінше, белгісіз жүргізуші анықталмаған көлікпен Марғұлан көшесімен батыс бағытта келе жатып, жолды белгіленбеген жерден кесіп өтіп бара жатқан ер адамды қағып кеткен. Жаяу жүргінші кейін №7 қалалық клиникалық ауруханада қайтыс болды.
Адам өліміне әкеп соққан жол-көлік оқиғасы фактісі Сотқа дейінгі тергеп-тексерулердің бірыңғай тізіліміне Қылмыстық кодекстің 345-бабының 3-бөлігі бойынша енгізілді. Тергеуді Алматы қалалық ІІД анықтау басқармасы жүргізіп жатыр.
«Радиоточка» материалдары бойынша.
