«Формула-1» Nike компаниясымен ұзақ мерзімді серіктестік жасасты. 2027 жылдан бастап америкалық компания чемпионаттың ресми серіктесі әрі киім мен униформаның ресми жеткізушісі болады: әлемнің барлық кезеңінде қызметкерлер F1 нышаны бар Nike формасын киеді. Келісім туралы Астана уақытымен 20 қарашаға қараған түні «Формула-1» хабарлады. Келісімшарттың сомасы жария етілмеді.
Nike аяқкиімнің, киім мен аксессуарлардың капсулалық топтамаларын шығарып, спорттық технологиялар әзірлейді және жарыс демалыстарында жанкүйерлерге арнайы іс-шаралар ұйымдастырады. Алғашқы топтама 20 қарашада-ақ шығады: Las Vegas Grand Prix x Nike шектеулі сериясы жергілікті Гран-при алдында F1 Hub фан-аймағы мен Лас-Вегастағы Nike дүкендерінде сатыла бастайды. Сонымен қатар Nike әйелдерге арналған F1 Academy сериясының ресми серіктесі және оның пилоттарына спорттық киім жеткізуші болады.
«»Формула-1″ мен Nike — инновацияға, ең жоғары деңгейде өнер көрсетуге және адамдарды мүмкіндік шегінен асуға шабыттандыруға деген тынымсыз ұмтылыс біріктірген әлемдегі ең танымал екі бренд», — деді «Формула-1» президенті әрі бас директоры Стефано Доменикали. Оның сөзінше, бұл — «коммерциялық серіктестіктен әлдеқайда артық нәрсе». «»Формула-1″ — бұл бәсеке, жылдамдық және инновацияға деген тұрақты ұмтылыс. Бұл — спортшының ойлау жүйесі, ал біз Nike-та оны бөлісеміз», — деп қосты Nike президенті әрі бас директоры Эллиотт Хилл.
Биыл «Формула-1» сән әлемімен бұған дейін де бірлесіп жұмыс істеген: жақында BLACKPINK әншісі Лиса F1-мен бірлескен топтамасының заттарын көрсетті, ондағы дулыға көшірмесінің бағасы — 9000 доллар. Лас-Вегас Гран-приі осы демалыста өтеді, одан кейін 2026 жылғы маусымда Катар мен Әбу-Даби кезеңдері қалады.



