«Колорадо Эвеланш» бас бапкері Джаред Беднар 14 қарашада, сенбіде, команда көшбасшыларының қанша уақыт ойнамайтынын айтты: шабуылшы Натан Маккиннон кемінде бір ай, ал қорғаушы Кейл Макар шамамен екі апта сапқа шықпайды. Бұл туралы The Denver Post тілшісі Кори Масисак хабарлады. Екеуі де дененің төменгі бөлігінен жарақат алған.
«Колорадо» жұлдыздары бір матчта сыр берді — бейсенбі күні «Оттава Сенаторзбен» болған ойында. Бұл кездесуде «Эвеланш» овертаймда 3:4 есебімен жеңілді. Маккиннон екінші кезеңде «Сенаторз» қорғаушысы Артем Зубпен соқтығысқаннан кейін жарақаттанып, бірден киім ауыстыратын бөлмеге кетті. Макар қарсыласпен түйіспей-ақ жарақат алды: қысқа ауысымнан кейін мұзға қайта шығып көрді, бірақ матчты аяқтай алмады. Ол жексенбіде де жаттығуды мерзімінен бұрын тастап кеткен. Сенбіге дейін клуб мерзімді атамаған, тек екеуінің «Монреальмен» матчқа шықпайтыны белгілі болған.
«Сол екеуін ойласам — олар әр текетіресті өз мойнына алады, енді мұны басқа біреу қолға алып, атқара білуі керек. Сонымен бірге құрамның төменгі буындарындағы тереңдікті де жоғалтасың, өйткені бәрі бір саты жоғары көтеріледі», — деді Беднар журналистерге. Шабуылшы Арттури Лехконен: «Әлемдегі ең үздік екі ойыншысыз қалғанда, оларды шынымен алмастыра алмайсың», — деп мойындады. Клуб АХЛ-ден шабуылшы Гэвин Бриндлиді шақырып алды.
«Колорадо» үшін бұл — ауыр шығын. Маккиннон 20 матчта 30 ұпай (10 гол, 20 пас) жинап, команданың үздік бомбардирі әрі лигада бесінші орында тұр. Үздік қорғаушыға берілетін «Норрис Трофи» жүлдесін екі рет алған Макар 23 ұпай (5+18) жинап, НХЛ қорғаушылары арасында нәтижелілік жағынан үшінші орында келеді. Жазда ол клубпен 163,2 млн долларға, яғни шамамен 72,5 млрд теңгеге сегіз жылдық рекордтық келісімшарт жасады. 11 жеңіс, негізгі уақыттағы алты жеңіліс және овертаймдағы үш жеңілісі бар «Эвеланш» Орталық дивизионда үшінші орында. Көшбасшыларсыз алғашқы матчты команда 15 қарашада Астана уақытымен сағат 05:00-де қатарынан 12 ойында негізгі уақытта жеңілмей келе жатқан «Монреальмен» өткізеді.
